Тожикистон ташқи ишлар вазири Сирожиддин Муҳриддин бир қатор МДҲ давлатлари ҳудудида фуқаролари, хусусан, тожикистонлик муҳожирлар ва талабалар ҳуқуқлари бузилганидан хавотир билдирди. Бу ҳақда Asia-Plus хабар берди.
Муҳриддин 7 октябрь куни Москвада бўлиб ўтган МДҲ Ташқи ишлар вазирлари кенгаши йиғилишида бу борада нутқ сўзлади.
Бундай муносабат инсонийликнинг асосий тамойилларига жавоб бермайди ва МДҲ фаолиятининг асосий принципларини шубҳа остига қўяди. Миграция масалаларини ҳал этишда қабул қилувчи томон, келиб чиқиш мамлакати, ишлаётган фуқаролар ва маҳаллий аҳоли манфаатларини тенг даражада ҳисобга оладиган комплекс, пухта ва шаффоф ёндашув зарур, дея таъкидлади Тожикистон ташқи ишлар вазири.
Сирожиддин Муҳриддин республиканинг МДҲдаги келгуси раислиги доирасида Душанбе ҳамдўстликка аъзо мамлакатларга узоқ вақтдан бери муҳокама босқичида турган бир қатор лойиҳаларни келишиш бўйича ҳамкорликни фаоллаштиришни таклиф этади.
Бу лойиҳалар қуйидагиларни ўз ичига олади: умумий меҳнат бозорини босқичма-босқич шакллантириш ва ишчи кучи миграциясини тартибга солиш концепцияси, меҳнат мигрантлари ҳужжатларини ўзаро тан олиш тўғрисидаги битим ҳамда ходимлар яшаш давлатидан ташқарида бўлганида содир бўлган ишлаб чиқаришдаги бахтсиз ҳодисаларни текшириш тартиби тўғрисидаги битимга ўзгартиришлар киритиш тўғрисидаги протокол.
Аввалроқ Тожикистон бош вазири Қоҳир Расулзода Россияда ўз фуқароларининг “ҳуқуқ ва эркинликлари” бузилганини эълон қилганди. У Тожикистон фуқароларини Россияга киритмаслик, мамлакатга киришини тақиқлаш ёки депортация қилиш ҳолатлари кўпаяётганини айтганди.
Россияда миграция майдонини тартибга солиш бўйича тадбирларни ўтказишда фуқароларимизнинг асосий ҳуқуқ ва эркинликларини ҳар томонлама бузиш тенденцияси бизни ташвишга солмаслиги мумкин эмас, деган у.
Изоҳ (0)