Tojikiston tashqi ishlar vaziri Sirojiddin Muhriddin bir qator MDH davlatlari hududida fuqarolari, xususan, tojikistonlik muhojirlar va talabalar huquqlari buzilganidan xavotir bildirdi. Bu haqda Asia-Plus xabar berdi.
Muhriddin 7-oktyabr kuni Moskvada bo‘lib o‘tgan MDH Tashqi ishlar vazirlari kengashi yig‘ilishida bu borada nutq so‘zladi.
Bunday munosabat insoniylikning asosiy tamoyillariga javob bermaydi va MDH faoliyatining asosiy prinsiplarini shubha ostiga qo‘yadi. Migratsiya masalalarini hal etishda qabul qiluvchi tomon, kelib chiqish mamlakati, ishlayotgan fuqarolar va mahalliy aholi manfaatlarini teng darajada hisobga oladigan kompleks, puxta va shaffof yondashuv zarur, deya ta’kidladi Tojikiston tashqi ishlar vaziri.
Sirojiddin Muhriddin respublikaning MDHdagi kelgusi raisligi doirasida Dushanbe hamdo‘stlikka a’zo mamlakatlarga uzoq vaqtdan beri muhokama bosqichida turgan bir qator loyihalarni kelishish bo‘yicha hamkorlikni faollashtirishni taklif etadi.
Bu loyihalar quyidagilarni o‘z ichiga oladi: umumiy mehnat bozorini bosqichma-bosqich shakllantirish va ishchi kuchi migratsiyasini tartibga solish konsepsiyasi, mehnat migrantlari hujjatlarini o‘zaro tan olish to‘g‘risidagi bitim hamda xodimlar yashash davlatidan tashqarida bo‘lganida sodir bo‘lgan ishlab chiqarishdagi baxtsiz hodisalarni tekshirish tartibi to‘g‘risidagi bitimga o‘zgartirishlar kiritish to‘g‘risidagi protokol.
Avvalroq Tojikiston bosh vaziri Qohir Rasulzoda Rossiyada o‘z fuqarolarining “huquq va erkinliklari” buzilganini e’lon qilgandi. U Tojikiston fuqarolarini Rossiyaga kiritmaslik, mamlakatga kirishini taqiqlash yoki deportatsiya qilish holatlari ko‘payayotganini aytgandi.
Rossiyada migratsiya maydonini tartibga solish bo‘yicha tadbirlarni o‘tkazishda fuqarolarimizning asosiy huquq va erkinliklarini har tomonlama buzish tendensiyasi bizni tashvishga solmasligi mumkin emas, degan u.
Izoh (0)