“Ўғлим дуоларида менга жуфт сўрайди”. Дилноза Кубаева тўйи ҳақидаги орзулари ва “чиллада” экани ҳақида

Актриса Дилноза Кубаева “Миллий” телеканалига берган қисқа интервьюсида шахсий ҳаёти билан боғлиқ саволларга жавоб берди.

Тўй билан боғлиқ армонингиз борми?

— Ўзим кўп тўйларда қатнашганимда, Худо хоҳласа, кўнглимдаги инсонни учратиб, турмушга чиқсам, бу сафар мана шунақа бўлади, дейман. Ўзимни роса бекитиб қўйганман, очилишга қийналаман. Бошқаларга бу ғалати туюлиши мумкин: Лекин бу галги тўйим худди биринчи марта турмушга чиқаётгандек бўлишини хоҳлайман. Баланд бўйли ўғлим ёнимда туриб, мен билан турмуш ўртоғим билан рақсга тушишини хоҳлардим. Санъаткорлар навбати тиқилинч бўлишини эмас, ҳамма нарса кўнгил учун, руҳий озуқа учун бўлишини хоҳлардим.

“Чилладаман”

— Ўзим мураккаб инсонлар тоифасига кираман. Кулиб юрганим билан ичимда нима ғалаёнлар, чақмоқлар бўлади, бу ўзимга аён. Балки шунинг учун ҳам ижодкор бўлгандирман. Шунинг учун ҳам бу бешафқат катта майдонда бордирман. Ўзимни ўраганман, доим карантиндаман. Ўзимни доим чиллада сақлагандек сақлайман. Чунки мен гарданида анча-мунча вазифалари бор аёл деб биламан, чунки давлат ишида ишлайман, онаман, фарзандман.

Ўғли унинг яна оила қуришига қандай қарайди?

— Олдин бу ҳақда қўрқинчли гаплар гапирарди. Ҳозир эса дуоларида сўрайди. Чунки динимизда ҳам фарзанднинг ота-онасига жуфти ҳалолли бўлишига ёрдам бериши кераклиги. Фарзандимнинг шуни тушуниб, англаб етганидан хурсанд бўламан. Мен ҳозир жудаям мустақил, хотиржам аёлман. Чунки кичкинагина қўрғонимни, касбимни яхши олиб боряпман. Бир куним йўқки, бирон нарса ўқимасам, ёки ёдламасам. TVда ҳар куни кўринмаганим билан ижодда йўқ бўлиб кетганим йўқ. Энди қарангки, кимгадир, ўйламасдан, кўр-кўрона кимгадир тегсам-у, бор-будимдан айрилиб қолсамчи, деб ўйлайман, ютқизишдан қўрқаман.