Ливан пойтахти Байрутга уюштирилган ҳаво ҳужуми оқибатида Эрондан “Ҳизбуллоҳ” гуруҳига қурол-яроғ етказиб бериш учун масъул бўлган Суҳайл Ҳусайн Ҳусайний ҳалок бўлди. Бу ҳақда Исроил мудофаа кучлари хабар берди.
Ҳусайний Эрон ва “Ҳизбуллоҳ” ўртасида қурол-яроғ ўтказилишида ҳал қилувчи рол ўйнаган ҳамда “Ҳизбуллоҳ” бўлинмалари ўртасида замонавий қурол-яроғларнинг тақсимланишига масъул бўлган. Қуролларнинг ташилиши ва тарқатилишини назорат қилган.
Исроил армиясига кўра, Ҳусайний “Ҳизбуллоҳ” гуруҳининг энг муҳим лойиҳалари учун бюджет ва логистикага масъул бўлган. У Ливан ва Суриядан Исроил давлатига қарши ҳужумларни мувофиқлаштиргани айтилмоқда. “Ҳизбуллоҳ” гуруҳи бу борада ҳали расмий маълумот бермаган.
“Ҳизбуллоҳ” раҳбариятини йўқ қилиш
Сентябрь ойи ўрталарида Ливанда “Ҳизбуллоҳ” тезкор алоқа учун фойдаланадиган пейжерлар ва рациялар портлаши содир бўлди. 27 сентябрь куни кечқурун Исроил армияси Байрутнинг жанубий чеккасида “Ҳизбуллоҳ” штабига ҳаво ҳужуми уюштириб, “Ҳизбуллоҳ”га 30 йилдан ортиқ раҳбарлик қилган гуруҳ раҳбари Ҳасан Насруллоҳни ўлдирди.
Насруллоҳ билан бирга унинг қизи Зайнаб, ҳаракатнинг бир қатор юқори мартабали аъзолари, шунингдек, Эрон Ислом инқилоби қўриқчилари корпуси генерал майори Аббос Нилфорушон ўлдирилди.
Изоҳ (0)