Бугунги кунда Тошкентдаги Ўзекспомарказ кўргазмалар залида турли мамлакатлардан ташриф буюрган ишлаб чиқарувчиларнинг маҳсулотлари намойиш этилган бўлиб, улар орасида Россиянинг “Завод Фигур” компанияси маҳсулотлари ҳам жой олган.
“Завод Фигур” ёғоч ва металлардан турли шакллар, дизайнерлик фигуралари, болалар ва спорт майдончалари учун керакли маҳсулотлар, турли ўриндиқлар ва шезлонглар, ўзидан ёруғлик чиқарадиган ҳар хил конструкциялар ишлаб чиқарувчи Россия компанияси бўлиб, ҳозирда мазкур компания ўз қамровини кенгайтириб бормоқда.
“Завод Фигур” компанияси асосчиси учун Ўзбекистон бегона эмас. Унинг ўзи Россияда туғилган бўлса ҳам, ота-онаси Ўзбекистондан. Шу сабабли тарихий ватанида ишлаб чиқаришни йўлга қўйиб, одамларни иш билан таъминлашни мақсад қилган.
Компания асосчиси Икром Шерматов “Дарё” билан суҳбатда “Завод Фигур”нинг Ўзбекистондаги режалари ҳақида сўзлаб берди.
“Мен ўзим Россияда туғилган бўлсам ҳам миллатим ўзбек, ота-онам ўзбекистонлик. Совет Иттифоқи даврида Россияга ишлаш учун бориб, ўша ерда қолиб кетишган. Биз ҳар доим Ўзбекистонда ҳам ишлаб чиқаришни йўлга қўйишни режа қилардик. Мана энди шу режамизни амалга оширмоқчимиз. Бизнинг компаниямизда ишлайдиган аксарият ходимлар ҳам Ўзбекистондан. Бу ерда филиал очадиган бўлсак, улар ўз ватанларига қайтиб келиб, шу ерда ишлашдан мамнун бўлишади.
Биз хиёбонлар, болалар ва спорт майдончалари, кўчалар учун зарур бўлган турли маҳсулотларни ишлаб чиқарамиз. Булар ўриндиқлар, урналар, пергола ва арғимчоқлар, хуллас, шаҳар ривожи учун зарур бўлган барча нарсалар. Бизнинг компаниямиз 2015 йилда ташкил этилган бўлиб, бошида атиги 10 нафар ишчимиз бўлган. Биз кундан кунга ривожланиб, ишлаб чиқаришни кенгайтирдик. Ҳозирда компаниямизда 1000 га яқин ходим фаолият олиб боради.
Биз Ўзбекистонга ўз маҳсулотларимизни намойиш қилиш учун келдик. Режамиз Тошкент шаҳрида компаниямиз филиалини очиш, янги иш ўринларини яратиш. Тошкентда очиладиган филиалимизга 500 нафарга яқин ходим олмоқчимиз. Булар дурадгорлар, пайвандчи усталар, металл бўйича мутахассислар, йиғувчи ва қадоқловчилар”, — дейди Икром Шерматов.
Изоҳ (0)