Россиялик мухолифатчи Алексей Навальнийнинг беваси Юлия Навальная Американинг Тime журнали талқинига кўра, дунёдаги энг нуфузли 100 киши рўйхатига киритилди. У нашрга турмуш ўртоғи вафотидан кейин илк марта интервью берди.
Суҳбат Вильнюсда, Навальний вафотидан бир ой ўтиб бўлиб ўтган эди.
Навальнаянинг сўзларига кўра, у эрининг ўлими ҳақида Мюнхен конференциясидаги чиқишидан олдин Россия матбуотидаги хабарлардан билган. Бу каби хабарлар фақат Россия расмий манбалари маълумотларига асосланганлиги сабабли, Навальная аввал ҳаммасини аниқлаб олиш керак деган қарорга келган.
Навальная эрини охирги марта 2022 йил февраль ойи ўрталарида, Россиянинг Украинага ҳужуми бошланишидан сал аввал кўрган.
У билан телефонда гаплашиш имкони бўлмаган. Эҳтимол, бир ёки икки марта, жуда қисқа. Ёзда, туғилган кунимда у менга қўнғироқ қилишга муваффақ бўлган. “Салом, салом” деган ва дарҳол алоқа узилган. Ўшанда унинг мен билан саломлашганини охирги марта эшитган эдим, — дейди Навальная.
Сиёсатчи бевасининг сўзларига кўра, у етакчисиз қолган тарафдорларини қўллаб-қувватлаш ва Владимир Путин режимидан норози россияликларга умид боғлаш мақсадида эрининг ишини давом эттиришга қарор қилган. Навальная эри билан ҳеч қачон унинг ишини давом эттириш масаласини муҳокама қилмаган.
Мен Кремль ва унинг расмийлари тушунишларини хоҳлайман: улар Алексейни ўлдирган бўлса, мен унинг ўрнини эгаллайман. Агар менга бирор нарса қилишса, бошқа одам келади, — деди Навальная.
Унинг фикрича, Россияга қарши амалдаги Ғарб санкциялари иш бермаяпти. У мазкур санкциялар фақат “Путиннинг дўстлари ва унинг яқин доиралари аъзолари”га қаратилган бўлиши кераклигини айтган.
Навальная АҚШ президенти Жо Байден билан шахсий учрашувда санкциялар масаласини муҳокама қилган.
Сиёсатчининг беваси айтганидек, Ғарб Россия президенти “қизил тугмачани босиб, ядро қуролини қўллашидан” қўрқиб, Путин ва унинг атрофидагиларга қарши санкцияларни кечиктираётган бўлиши мумкин.
Путин мендан қўрқадими ёки йўқми, менга фарқи йўқ. Мен Путинга қарши курашаман. У менинг душманим, — дея Навальная эрининг ўлими учун Россия президентини жавобгар эканлигини таъкидлаган.
У тарғиботчилар ва Россия расмийлари томонидан унга нисбатан босим кучайишига тайёрлигини айтган.
Изоҳ (0)