Россия ҳукумати хорижликлар “русофобия”си учун жазо жорий этишни маъқуллади.
Вазирлар Маҳкамаси хориждаги “Русофобия” учун жиноий жавобгарликни жорий этиш тўғрисидаги қонун лойиҳасига расмий жавобнинг ижобий лойиҳасини тайёрлади, дейилади хабарда.
РФ Жиноят кодексига янги 136.1 “русофобия” моддасини киритиш режалаштирилмоқда. Модданинг биринчи қисми хорижликлар (шу жумладан, мансабдор шахслар) томонидан Россиядан ташқарида Россия фуқаросига, шунингдек, мамлакатда доимий яшовчи фуқаролиги бўлмаган шахсга ёки Россия фуқароси бўлмаган ватандошга нисбатан содир этилган камситиш ҳаракатлари учун, иккинчи қисми эса бундай ҳаракатларни содир этишга оммавий чақириқлар учун жавобгарликни назарда тутади.
Ҳукумат мазкур моддада назарда тутилган муайян лавозимларни эгаллаш ёки муайян фаолият билан шуғулланиш ҳуқуқидан маҳрум қилиш тарзидаги жазога доир мулоҳазаларни қўллаш шарти билан мазкур қонун лойиҳасини маъқуллади. Вазирлар Маҳкамаси жиноят предметининг ўзига хос хусусиятларини инобатга олган ҳолда мазкур қоидани амалда қўллашда қийинчиликлар юзага келиши мумкинлигини таъкидлаган.
Шунингдек, Жиноят кодексининг 12-моддаси 3-қисмига, хусусан, “Россиядан ташқарида жиноят содир этган шахсларга нисбатан жиноий қонуннинг таъсири”га ҳам ўзгартиришлар киритиш режалаштирилган. Бундан буён у Россияда доимий истиқомат қилмайдиган, Россия фуқаролигисиз ватандошларига қарши жиноят содир этган хорижликлар ва фуқаролиги бўлмаган шахсларга нисбатан қўлланилади.
Изоҳ (0)