Альбания пойтахти Тиранада Римдаги Ватиканга ўхшаб митти давлат тузиш режалаштирилган. Аммо у католиклар учун эмас, балки мўтадил мусулмон жамоаси бўлмиш бектошларга мўлжалланган бўлади. Бу ҳақда The New York Times хабар берди.
Маълумотни Альбания бош вазири Эди Рама ҳамда Бектоший сўфийлик тариқатининг диний раҳбари, Баба Монди номи билан танилган Эдмонд Браҳимай тасдиқлаган.
Бўлажак шаҳар-давлат ҳудудида спиртли ичимликларни истеъмол қилишга рухсат берилади, аёллардан рўмол ўраш талаб қилинмайди ва уларга ўзлари хоҳлаган кийимларни кийишга ижозат берилади. Турмуш тарзига оид ҳеч қандай кўрсатмалар мажбурий бўлмайди.
“Яратган ҳеч нарсани тақиқламайди. Шунинг учун у инсонларга ақл-идрок берган”, дейди Эдмонд Браҳимай NYT нашрига берган интервьюсида.
Митти давлатнинг майдони атиги ўн гектар атрофида бўлиши кутилмоқда, бироқ у ерда ўз администрацияси, паспортлари бўлади, чегараларга амал қилинади.
Эди Рама янги давлатга асос солишдан мақсад Альбания фахрланадиган исломнинг бағрикенглик версиясини тарғиб қилишдан иборат эканини айтди.
Биз бу бойликни — диний бағрикенгликни — асраб-авайлашимиз ва уни ҳеч қачон ўз-ўзидан тушунарли деб билмаслигимиз керак, деб таъкидлади у.
Альбания бош вазири мўтадил ислом микродаражасининг яратилиши “Мусулмонлар ҳақидаги стереотипларнинг мусулмонлар кимлигини аниқлашига йўл қўйманг” деган сигнал юборишига ишонади.
Изоҳ (0)