Шахмат Олимпиадаси. Ўзбекистон жамоалари иккинчи турда ҳам ғалаба қозонди

Венгрия пойтахти Будапешт шаҳрида 45-Бутунжаҳон шахмат Олимпиадаси давом этмоқда.

12-сенябр куни 2-тур баҳслари бўлиб ўтди. Амалдаги чемпион саналган Ўзбекистон йигитлар жамоаси Мисрни 3.5:0.5 ҳисобида мағлубиятга учратди. Қизлар жамоаси Анголадан 3:1 ҳисобида устун келди.

Ушбу турда Жаҳонгир Воҳидов ўрнига Жавоҳир Синдоров ҳаракат қилди. Айнан у Миср вакили Вафа Ҳамид билан дуранг қайд этди. Қолган барча иштирокчилар ўз баҳсларида ғалабага эришди.

Қизлар жамоасида ҳаракатланаётган Нилуфар Якуббоева Ангола вакилига мағлуб бўлди. Қолган уч шахматчининг ғалабаси Ўзбекистон қизларининг Ангола устидан ғалабасини таъминлади — 3:1.

Маълумот учун, Ўзбекистон вакиллари биринчи турда ҳам ғалаба қозонган эди. Ўзбекистон эркаклар жамоаси Trinidad ва Tobagoни (3:1) мағлуб этган бўлса, қизлар жамоаси Гаитидан (4:0) устун келди.

Бугун, 13 сентябрь куни 3-тур учрашувлари ўтказилади. Унда Ўзбекистон эркаклар терма жамоаси хорватиялик шахматчиларга қарши баҳс олиб боради. Қизлар жамоаси мезбон Венгрия терма жамоасига қарши дона суради.