Ўзбекистонда илк бор мукофот жамғармаси 166 минг АҚШ доллари бўлган “Uzchess Cup” турнири ўз якунига етди.
Мусобақа ўзбек шахматчилари учун омадли бўлди. “Masters” гуруҳида қатнашган Нодирбек Абдусатторов ҳамда Нодирбек Ёқуббоев сўнгги тургача пешқадамликни сақлаб турди. Сўнгги турда Нодирбекларнинг иккиси ҳам рақиблари билан муроса йўлини танлади. Шундай қилиб, қўшимча коэффициентлар эвазига Ёқуббоев биринчи ўринни қўлга киритди. Чемпионлик билан бирга шахматчи 25 минг АҚШ долларини ҳам қўлга киритди. Иккинчи ўринни эгаллаган Ўзбекистоннинг биринчи рақамли шахматчиси 20 минг АҚШ долларига эга чиқди. Мусобақани 3-ўринда якунлаган Ю Янгйи 15 минг АҚШ доллари ҳисобидаги пул мукофотини қўлга киритди.
Мусобақани 5-ўринда якунлаган Жавоҳир Синдоров 10 минг АҚШ долларини қўлга киритди.
“Futures” гуруҳида Шамсиддин Воҳидовга тенг келадиган рақиб топилмади.
Мусобақа чемпиони Шамсиддин Воҳидов 15 минг АҚШ долларини қўлга киритди. Ўзбекистон терма жамоаси сардори Жаҳонгир Воҳидов мусобақани 5-ўринда якунлади ҳамда қатнашчилар учун ажратилган 2 минг АҚШ долларига эга чиқди.
“Futures” гуруҳида Ўзбекистоннинг 4 шахматчиси қатнашди. Мусобақада Сайдалиев Саидакбар ҳамда Суяров Муҳаммадзоҳид бир хил — 5,5 очко тўплади, Саидакбар қўшимча коэффициэнтлар эвазига мусобақанинг учинчи ўрнини эгаллади ва 3 минг АҚШ долларига эга чиқди. Ушбу гуруҳда биринчи ўринни қўлга киритган Сивук Витали 7 минг АҚШ долларига, иккинчи ўриндаги Данешвар Бардия эса 5 минг АҚШ долларига эга чиқди.
Шундай қилиб Тошкентда ташкил этилган энг йирик шахмат турнирларидан бири ўз ниҳоясига етди. Ушбу баҳсларда ўзбек шахматчилари пул мукофоти билан бирга қимматли рейтинг очколарига эга чиқди.
Изоҳ (0)