НАТО разведкачи самолётлари жойлашган Германиянинг ғарбий қисмидаги Гайленкирхен авиабазасида хавфсизлик чоралари кучайтирилди. Бу ҳақда Der Spiegel хабар берди.
Таъкидланишича, огоҳлантириш чораси сифатида миссия учун зарур бўлмаган барча ходимлар уйларига жўнатилган. Разведка маълумотлари хавф эҳтимоли борлигини кўрсатмоқда.
“Биз потенциал таҳдидни кўрсатувчи разведка маълумотлари асосида НАТОнинг Гайленкирхендаги авиабазасида хавфсизлик даражасини оширдик”, дейилади хабарда.
База ходимига кўра, бу ташвишланишга сабаб бўлмайди, балки муҳим операцияларни давом эттиришни таъминлаш учун оддий эҳтиёт чораси ҳисобланади.
Ўтган ҳафта Германиянинг Кёльндаги ҳарбий базаси ичимлик суви ифлосланиши ва эҳтимолий қўпорувчилик ҳаракати шубҳаси туфайли бир неча соатга ёпиб қўйилганди. Текширув натижалари сувнинг ифлосланмаганини кўрсатди. Шу билан бирга, НАТО мазкур базасига киришга уриниш бўлганини маълум қилди. Буни амалга оширишга уринган шахс қўлга олинди. Ушбу икки ҳодиса ўртасидаги боғлиқлик аниқланмаган.
Изоҳ (0)