NATOning yangi bosh kotibi Mark Ryutte 1-oktyabrdan o‘z vazifasini bajarishga kirishadi. Bu haqda alyans xabarida aytilgan.
Mark Ryutte bu lavozimda besh yil ishlaydi. Joriy yilning iyun oyida uning nomzodi NATOga a’zo davlatlar tomonidan ma’qullangan edi.
Mark Ryutte 2010-yildan beri Niderlandiya bosh vaziri sifatida ishlab kelayotgandi. U Kiyevning sodiq ittifoqchisi va Rossiya prezidenti Vladimir Putinning tanqidchisi sifatida shuhrat qozongan.
Hozirda NATO Bosh kotibi sifatida Yens Stoltenberg faoliyat yuritmoqda.
![](/static/2024/09/11/ryutte1-0kuFrwHo.jpeg)
Iyul boshida Vashingtonda bo‘lib o‘tgan NATO sammiti alyansning amaldagi bosh kotibi Yens Stoltenberg uchun oxirgi sammit bo‘lgandi.
Anjumanda Stoltenberg Ryutte haqida qisqa fikr bildirib, u agar vazifaga tayinlansa, bu eng to‘g‘ri qaror bo‘lishini aytgandi. Alyansda Mark Ryutteni tanlash borasida hech qanday qarama-qarshiliklar yo‘qligini ham maʼlum qilgan.
“Menimcha, Mark juda kuchli nomzod. U bosh vazir sifatida katta tajribaga ega. U yaqin do‘st va hamkasb, shuning uchun ham tez orada alyans uning mening o‘rnimga nomzod bo‘lishi haqida qaror qabul qilishiga qattiq ishonaman. Bu barchamiz uchun, NATO va men uchun ham yaxshi bo‘ladi”, degandi NATO bosh kotibi.
Izoh (0)