Демократик партиядан АҚШ президентлигига номзод Камала Ҳаррис Американинг Чикаго шаҳрида ўз партиядошларининг миллий конгрессида сўзлаган нутқида, агар Америка Қўшма Штатлари президентлигига сайланса, Украина ва НАТОни “қатъий қўллаб-қувватлаш”га ваъда берди.
![](/static/2024/08/23/photo_2024-08-23_19-03-50-ueuD0fmo.jpg)
Президент сифатида мен Украина ва НАТОдаги иттифоқчиларимиз томонида қатъий бўламан, деди у Чикагодаги United Center минбаридан туриб.
Аввалроқ АҚШнинг собиқ президенти Барак Обама Чикагодаги Демократик партиянинг миллий қурултойида нутқ сўзлаб, бўлажак президентлик сайловларида ўзининг узоқ йиллик сиёсий иттифоқчиси Ҳаррис номзодини қўллаб-қувватлаган эди.
Америка янги бобга тайёр. Америка яхшироқ ҳикояга тайёр. Биз президент Камала Ҳаррис учун тайёрмиз. Камала Ҳаррис эса ишга тайёр, дейди Обама.
Шунингдек, Cооk Political Report сиёсий ахборотномаси ўтказган сўров натижалари Ҳаррис штатларда аҳоли орасида қўллаб-қувватлаш бўйича республикачи рақиби Дональд Трампни ортда қолдирганини кўрсатган эди.
Тадқиқотга кўра, Ҳаррис Пенсильвания, Висконсин, Аризона, Мичиган ва Шимолий Каролина штатларида Трампдан устунликка эга. Невада штатида республикачи етакчилик қилмоқда, Жоржия штатида эса ҳар икки номзодни қўллаб-қувватлаш даражаси бир хил.
Қайд этилишича, Ҳаррис умумий ҳисобда Трампдан 2 фоизлик устунликни сақлаб турибди – респондентларнинг 46 фоизи уни қўллаб-қувватлашга, 44 фоизи эса рақибини қўллаб-қувватлашга тайёр. Респондентларнинг яна 5 фоизи мустақил номзод кичик Роберт Кеннеди учун овоз бериш ниятини билдирган.
Изоҳ (0)