Тошкентда “Цефтриаксон” олган аёл нафаси бўғилиб, ҳушини йўқотгани, у тезкорлик билан шифохонага олиб борилиб, ҳаёти сақлаб қолингани ҳақида хабарлар тарқалди. Фармацевтика маҳсулотлари хавфсизлиги маркази бунга муносабат билдирди.
![](/static/2024/09/06/photo_2024-09-06_13-53-36-R5g752_O.jpg)
Унда айтилишича, Тошкент шаҳрининг Яшнобод туманида яшовчи фуқаро А.Х. ўзида 3 кун давомида иситма, ҳолсизлик кузатилгандан сўнг, уй шароитида даволаниш мақсадида шифокор тавсиясисиз, ўзбошимчалик билан “Цефтриаксон” ва “Лидокаин” дори воситалари аралашмасини онаси ёрдамида мушак орасига қабул қилган. Орадан 10 дақиқа ўтгач, беморда бадан қақшаши, кучли ҳолсизлик, нафас сиқиши ва қон босимининг меъёридан ошиб кетиши кузатилган.
Шундан сўнг фуқаро тез ёрдам машинасида дислокация бўйича дастлаб I.Эргашев номли 4-сон шаҳар клиник шифохонаси, кейин эса ихтисослашган ёрдам кўрсатиш мақсадида Ибн Сино номли 1-сон шаҳар клиник шифохонасига олиб келиниб, стандарт бўйича даво чоралари қўлланган. Бажарилган муолажалар натижасида беморда тошмалар, иситма, ҳолсизлик каби симптомлар бартараф этилиб, фуқаронинг аҳволи яхшилангандан кейин уйига жавоб берилган.
Маълум қилинишича, дастлабки ўрганишлар беморда кузатилган ножўя реакция мазкур дори воситасининг сифати билан боғлиқ эмаслигини кўрсатмоқда.
“Ушбу препарат қонунда белгиланган тартибда Ўзбекистонда давлат рўйхатидан ўтган ҳамда лаборатор текширувлар натижасида сертификатлаштирилиб, тиббиёт амалиётида қўллаш учун рухсат этилган. Шунга қарамасдан, бемордан қабул қилиб олинган препаратлар айни дамда марказ лабораторияларида қайта текширувдан ўтказилмоқда”, дейилади хабарда.
“Цефтриаксон” дори препарати кенг таъсир доирасига эга бўлган антибиотиклар оиласининг учинчи авлодига мансуб бўлиб, у бактериал инфекцияларни даволашда қўлланади. Лекин шамоллаш, грипп ва бошқа вирусли инфекциялар муолажасида таъсир кўрсатмайди.
Фармацевтика маҳсулотлари хавфсизлиги маркази бу препарат шифокор рецепти асосида берилиши ва шифокор назорати остида қўлланишини, ундан уй шароитида ўзбошимчалик билан фойдаланиш мутлақо мумкин эмаслигини эслатди.
Изоҳ (0)