Қирғизистонда январь ойида 9 киши “Цефтриаксон” туфайли анафилактик шокга (аллергик реакция) учради, улардан бири вафот этди. Бу ҳақда республика Соғлиқни сақлаш вазирлигига таяниб, “AKIпресс” хабар берди.
Аллергик реакциялар Ҳиндистон, Ўзбекистон, Британия, Хитой, Миср, Туркия, Россиянинг “Цефтриаксон” препаратига нисбатан кузатилган. Бешта ҳолатда уйга ташриф буюрган ҳамшира беморни анамнез текшируви, тиббиёт ходимлар кўрикигидан ўтказмай препаратни қўллагани аниқланган.
Мутахассисларнинг таъкидлашича, анафилактик шок кўпайиши тенденцияси мавжуд бўлиб, бу антибактериал препаратларни назоратсиз қабул қилиш натижасида келиб чиқади. Қирғизистон Соғлиқни сақлаш вазирлиги парентерал юбориш қатъий шифокор назорати остида ва фақат соғлиқни сақлаш ташкилотларининг даволаш хоналарида амалга оширилиши кераклигини маълум қилади.
Амбулатория шароитида даволанаётган беморларга антибиотик таблеткаларини олиш тавсия этилади.
“Анафилактик шок кўринишидаги ножўя реакцияларнинг юқори частотасига эътибор қаратиш лозим. Антибактериал препаратлар қатъий равишда рецепт асосида берилиши керак. Дори-дармонлар департаменти ҳар қандай шубҳали ён таъсир ҳақида хабар беришни сўрайди”, — дейилади Қирғизистон ССВ баёнотида.
Изоҳ (0)