Ангренда «Цефтриаксон» сабаб вафот этган 11 ёшли қизнинг ота-онаси фармацевтика компаниясидан норозилигини билдирди

Тошкент вилояти Ангрен шаҳрида 11 ёшли қиз «Цефтриаксон» дори воситаси сабаб вафот этгани ҳақида хабар берилганди. «Севимли» телеканалининг «Замон» информацион дастурида маълум қилинишича, марҳумнинг ота-онаси Болалар шифохонаси маъмуриятига тиббиёт ходимларидан бутунлай эътирози йўқлигини билдириб, тушунтириш хати ёзган.

Қизча олиб келинган шифохонанинг жонлантириш бўлими шифокори Аҳил Газиевнинг сўзларига кўра, Г.Р. оғир аҳволда бўлган.

«Аҳволи жуда оғир эди, клиник ўлим ҳолатида олиб келинган. Болага реанимация муолажалари қилинганидан кейин юраги ишлаб кетган. Нафас олиши суст бўлгани сабаб сунъий нафас олишга ўтказилган. Соат 06:55 гача қилинган реанимация муолажалари фойдасини бермади, юраги бошқа тикланмади ва биологик ўлим қайд этилган», — дейди Газиев.

Қизчанинг ота-онаси Болалар шифохонаси маъмуриятига тиббиёт ходимларидан бутунлай эътирози йўқлигини билдириб, тушунтириш хати ёзган.

Ангрен шаҳар Болалар шифохонаси бош шифокори Мунаввара Ғаниева 11 ёшли қизчанинг ўлими билан боғлиқ ҳодиса ҳозирда прокуратура органлари назоратига олинганини айтган. Унинг сўзларига кўра, болага инъекцияни онаси қилган.

«Биринчидан, болани инъекция қилган онасида тиббий маълумот йўқ. Иккинчидан, ҳеч қандай шифокорга мурожаат этмасдан, ўзининг хоҳиши бўйича дорихонадан дори олиб, инъекцияни амалга оширган. Ҳаттоки тиббиёт ходимларига ҳам уй шароитида тиббий инексион муолажаларни амалга оширишга рухсат берилмаган», — дейди у.

Шунга қарамасдан, қизчанинг ота-онаси «Цефтриаксон» дори воситасининг маълум партияси сифатсиз бўлса-да, муомалага чиқарилган ва фармацевтика компанияси қонун олдида жавоб берсин деган талабни қўймоқда. Фармацевтика тармоғини ривожлантириш агентлиги матбуот хизмати раҳбари Қизлархон Бегматова ҳолатга изоҳ берган.