Toshkentda “Seftriakson” olgan ayol shifoxonaga yotqizilgani haqidagi xabarlarga munosabat bildirildi

Toshkentda “Seftriakson” olgan ayol nafasi bo‘g‘ilib, hushini yo‘qotgani, u tezkorlik bilan shifoxonaga olib borilib, hayoti saqlab qolingani haqida xabarlar tarqaldi. Farmatsevtika mahsulotlari xavfsizligi markazi bunga munosabat bildirdi.

Unda aytilishicha, Toshkent shahrining Yashnobod tumanida yashovchi fuqaro A.X. o‘zida 3 kun davomida isitma, holsizlik kuzatilgandan so‘ng, uy sharoitida davolanish maqsadida shifokor tavsiyasisiz, o‘zboshimchalik bilan “Seftriakson” va “Lidokain” dori vositalari aralashmasini onasi yordamida mushak orasiga qabul qilgan. Oradan 10 daqiqa o‘tgach, bemorda badan qaqshashi, kuchli holsizlik, nafas siqishi va qon bosimining me’yoridan oshib ketishi kuzatilgan.

Shundan so‘ng fuqaro tez yordam mashinasida dislokatsiya bo‘yicha dastlab I.Ergashev nomli 4-son shahar klinik shifoxonasi, keyin esa ixtisoslashgan yordam ko‘rsatish maqsadida Ibn Sino nomli 1-son shahar klinik shifoxonasiga olib kelinib, standart bo‘yicha davo choralari qo‘llangan. Bajarilgan muolajalar natijasida bemorda toshmalar, isitma, holsizlik kabi simptomlar bartaraf etilib, fuqaroning ahvoli yaxshilangandan keyin uyiga javob berilgan.

Ma’lum qilinishicha, dastlabki o‘rganishlar bemorda kuzatilgan nojo‘ya reaksiya mazkur dori vositasining sifati bilan bog‘liq emasligini ko‘rsatmoqda.

“Ushbu preparat qonunda belgilangan tartibda O‘zbekistonda davlat ro‘yxatidan o‘tgan hamda laborator tekshiruvlar natijasida sertifikatlashtirilib, tibbiyot amaliyotida qo‘llash uchun ruxsat etilgan. Shunga qaramasdan, bemordan qabul qilib olingan preparatlar ayni damda markaz laboratoriyalarida qayta tekshiruvdan o‘tkazilmoqda”, deyiladi xabarda.

“Seftriakson” dori preparati keng ta’sir doirasiga ega bo‘lgan antibiotiklar oilasining uchinchi avlodiga mansub bo‘lib, u bakterial infeksiyalarni davolashda qo‘llanadi. Lekin shamollash, gripp va boshqa virusli infeksiyalar muolajasida ta’sir ko‘rsatmaydi.

Farmatsevtika mahsulotlari xavfsizligi markazi bu preparat shifokor retsepti asosida berilishi va shifokor nazorati ostida qo‘llanishini, undan uy sharoitida o‘zboshimchalik bilan foydalanish mutlaqo mumkin emasligini eslatdi.