Наманганда фуқаро ИИБ ходимларини пичоқ ва ёғоч бўлаги билан жароҳатлади

Ижтимоий тармоқларда ИИБ ходимлари ва фуқаролар ўртасидаги зиддиятли ҳолат акс этган видеотасвирлар тарқалганди. Наманган ИИБ матбуот хизмати ҳолат юзасидан маълумот берди.

Унга кўра, 29 июль куни соат 20:50 да Учқўрғон тумани “Фарғона” маҳалласида яшовчи фуқаролардан ушбу ҳудудда фуқаро К.Қ. аҳоли тинчлигини бузиб, жанжал қилаётгани бўйича туман ИИБга хабар келиб тушган.

Хабарга асосан ушбу ҳудудга тунги хизматга бириктирилган икки нафар профилактика инспектори ҳодиса содир бўлган жойга зудликда етиб бориб, фуқаро К.Қ. томонидан содир этилаётган безорилик ҳаракатларини олдини олиш чораларини кўрмоқчи бўлганида, фуқаро профилактика инспекторларининг қонуний талабларини бажармай, уларга фаол қаршилик кўрсатиб қўлида бўлган хўжалик пичоғи ҳамда ёғоч бўлаги билан уриб тан жароҳати етказган.

Мазкур ҳолат юзасидан туман прокуратураси томонидан Жиноят кодексининг 219-моддаси (ҳокимият вакилига ёки фуқаровий бурчини бажараётган шахсга қаршилик кўрсатиш) 2-қисми билан жиноят иши қўзғатилиб, айбланувчига нисбатан қамоққа олиш тарзидаги эҳтиёт чораси қўлланилган ва ҳозирда дастлабки тергов ҳаракатлари олиб борилмоқда.