Украина ташқи ишлар вазирлиги Монголия расмийларини Халқаро жиноий суд (ХЖС) буйруғини бажаришга ва 3 сентябрь куни ушбу мамлакатга ташриф буюришни режалаштирган Владимир Путинни ҳибсга олишга чақирди.
Вазирлик баёнотида Украина томони Путиннинг ҳарбий жиноятчи эканлигини таъкидлаб, Рим статутини ратификация қилган Монголия ҳукумати “бу ҳақиқатдан хабардор бўлишига” умид билдирган.
“Украиналик болаларнинг кўчирилиши Путин ва Россиянинг қолган ҳарбий-сиёсий раҳбариятини жавобгарликка тортиши керак бўлган кўплаб жиноятлардан биридир. Бу шахслар Украинага қарши тажовузкор уруш, украинларга қарши ваҳшийлик, қотиллик, зўрлаш, талончилик, фуқаролик инфратузилмасини ўққа тутиш ва геноцидда айбдордир”, дейилади ТИВ баёнотида.
Шунингдек, вазирлик мажбурий халқаро ҳибсга олиш ордерини амалга ошириш ва Путинни Гаага судига топширишга чақирган.
Кремль матбуот хизмати Владимир Путиннинг 29 август куни мамлакат президенти Ухнаагиин Хурельсух таклифига биноан Монголияга бўлажак ташрифини эълон қилган эди. Путин 1939 йилда Халхин-Голда совет ва мўғул қўшинларининг Япония қуролли кучлари устидан қозонган ғалабасининг 85 йиллигини нишонлашга таклиф қилинган. Бу Путиннинг Халқаро жиноий суд уни ҳибсга олишга ордер берганидан кейин Рим статутини ратификация қилган мамлакатга биринчи ташрифи бўлиши кутилмоқда.
Кремль бу сафардан хавотирда эмаслигини айтди. Россия президенти матбуот котиби Дмитрий Песковнинг сўзларига кўра, Кремль “монголиялик биродарлари билан ажойиб мулоқотга эга” ва ташрифнинг барча жиҳатлари “пухта тайёрланган”.
Ташрифга тайёргарликдан хабардор Bloomberg манбаларига кўра, Путин Монголияга боришдан олдин ХЖС ордери билан ҳибсга олинмаслигига кафолат берилган. BBC таъкидлашича, Монголиянинг денгизга чиқиш имкони йўқ ва фақат Россия ҳамда Хитой билан чегарадош, бу Путинни ҳибсга олиш ва экстрадиция қилиш ҳақидаги фаразий иш бўйича Гаагага олиб келиш жараёнини мураккаблаштиради.
Изоҳ (0)