Франция президенти Эммануэль Макрон Павел Дуровни ҳибсга олиш қарори сиёсатга алоқадор эмаслигини маълум қилди.
![](/static/2024/08/26/photo_2024-08-26_19-39-40-Xwpd-Cj6.jpg)
“Павел Дуров ҳибсга олинганидан кейин Франция ҳақидаги ёлғон маълумотларни ўқияпман. Франция сўз ва мулоқот эркинлиги, инновациялар ва тадбиркорликка содиқдир. Telegram раҳбарининг Франция ҳудудида ҳибсга олиниши давом этаётган суд тергови доирасида амалга оширилди”, деб ёзди у Х ижтимоий тармоғидаги саҳифасида.
У мазкур иш сиёсий қарор эмаслигини таъкидлаган. Франция раҳбарига кўра, “ҳуқуқий давлатда фуқароларни ҳимоя қилиш ва уларнинг асосий ҳуқуқларини ҳурмат қилиш учун ижтимоий тармоқларда ҳам, реал ҳаётда ҳам эркинликлар қонун доирасида таъминланади”.
“Суд ҳокимияти тўлиқ мустақил фаолият юритиб, қонун ижросини таъминлаши шарт”, дея хулоса қилган Макрон.
Telegram асосчиси Павел Дуров 24 август куни Францияда ҳибсга олингани хабар берилганди. Маълум қилинишича, у Озарбайжондан Парижга шахсий самолётида борганда Ле Бурже аэропортида қўлга олинган.
Telegram’да модерациянинг йўқлиги, ушбу тармоқда содир бўлаётган ноқонуний ҳаракатлар, жумладан, гиёҳванд моддаларни тарқатиш, болалар порнографияси ҳамда фирибгарлик ва бошқа айбловлар учун Дуровга қидирув эълон қилинган. Шунингдек, француз ҳуқуқ-тартибот органлари билан ҳамкорлик қилмагани учун ҳибсга олиш ҳақида ордер берилган.
Изоҳ (0)