Telegram асосчиси Павел Дуровнинг ҳибсга олиниши ортида Вашингтон турибди, дея Давлат Думаси раиси Вячеслав Володин маълум қилди.
Унинг фикрича, АҚШ президенти Жо Байден учун президентлик сайловлари олдидан Telegram назоратини ўз қўлига олиш муҳим.
“Аслида Дуровнинг ҳибсга олиниши ортида Вашингтон турибди. Telegram Америка Қўшма Штатлари ҳеч қандай таъсир ўтказмайдиган кам сонли ва айни пайтда энг йирик интернет платформаларидан биридир. Шу билан бирга, улар учун қизиқарли бўлган кўплаб мамлакатларда ишлайди. АҚШ президентлик сайловлари арафасида Байден учун Telegram’ни назорат қилиш муҳим”, деб ёзади Володин ўз телеграм каналида.
Унинг таъкидлашича, Қўшма Штатлар учун ижтимоий тармоқларда кузатув, тотал цензура ва бўйсуниш, жумладан, турли таҳдидларга қарши кураш ниқоби остида шантаж қилиш сиёсий назорат ҳамда ташқи таъсирнинг анъанавий усуллари ҳисобланади.
“Кўпгина глобал тармоқлар Америкада яратилган. Оқ уй уларни назорат қилади. Аммо улар ҳали ҳам Telegram’ни олдиндан модерация ўтказишга ва АҚШ Давлат департаменти ҳамда Марказий разведка бошқармасига маълумотларни етказиб беришга мажбур қила олмаган. Шу сабабли, улар Франция орқали Дуровни ўндан ортиқ жиноятда айбламоқчи”, деб таъкидлаган Володин.
Telegram мессенжери асосчиси Павел Дуров 24 август куни Париждаги Ле Бурже аэропортида қўлга олинган эди. Маҳаллий матбуот хабарларига кўра, Франция фуқаролигига ҳам эга Дуров мамлакатда қидирувга берилганлар рўйхатида бўлган. Дуров Telegram’да кибер ва молиявий жиноятлар масалаларида ҳамкорлик қилишдан бош тортганликда айбланмоқда.
Ҳуқуқни муҳофаза қилиш органи ходимининг сўзларига кўра, Дуров ҳозирда миллий кибержиноятчилик ва фирибгарликка қарши кураш бошқармаси томонидан тергов қилинмоқда. Мессенжер асосчиси ҳамон ҳибсда сақланмоқда.
Аввалроқ Франция президенти Эммануэл Макрон хавфсизлик кучлари томонидан Telegram асосчисини ҳибсга олиш қарори сиёсий мотивлар билан боғлиқ эмаслигини маълум қилганди. У иш бўйича суд ҳукмини кутишга чақирган.
Изоҳ (0)