Афғонистонлик маршал Абдулрашид Дўстум Ўзбекистон ва Тожикистондан афғон учувчилари олиб ўтган авиатехникаларни Афғонистон қаршилик фронтига топширишга чақирди. Бу ҳақда Hasht-e Subh Daily хабар берди.
Маршал Дўстумнинг сўзларига кўра, мазкур авиатехникалар Аҳмад Масъуд бошчилигидаги Афғонистон қаршилик кучлари томонидан вилоятларда фойдаланиши керак. Маршал аввалги Афғонистон ҳукумати армиясига тегишли камида 40 та вертолёт Ўзбекистон ва Тожикистонга олиб ўтилганини айтди.
Дўстум “Толибон”га қаршилик кўрсатиш борасида ҳам гапириб, қаршилик фронтига кучларини тезда сафарбар қилишга чақирди. У қаршилик фронтидан 2024 йил “Толибон”га қарши оммавий ҳужумларга тайёргарлик кўришни сўради.
2021 йил август ойида “Толибон” Кобулни эгаллаб, ўша пайтдаги президент Ашраф Ғани мамлакатдан кетганида афғон ҳарбийлари самолёт ва вертолётда Ўзбекистонга қочиб ўтган. Ўзбекистон президентининг Афғонистон бўйича махсус вакили Исматилла Эргашев Ўзбекистонга собиқ афғон учувчилари томонидан олиб ўтилган самолёт ва вертолётлар “Толибон” ҳаракатига қайтарилмаслигини таъкидлаган.
Эргашевнинг сўзларига кўра, АҚШ ҳукумати авиатехника учун пул тўлаган ва Афғонистон собиқ ҳукуматига вақтинчалик фойдаланиш учун топширган. Сиёсатчи афғон самолётлари Ўзбекистонга кирган пайт чегарада бўлиб, воқеанинг бевосита иштирокчисига айланганини айтган. Расмий жараён Ўзбекистон суди ҳукмига биноан қарор қилиниши, лекин воситаларни олиб кетиш Америка ихтиёрида эканини таъкидлаган.
Статистик маълумотларга кўра, Афғонистон ҳукумати ўзгариши даврида Тожикистон ва Ўзбекистонга аввалги ҳукуматнинг 60 дан ортиқ ҳарбий вертолётлари олиб ўтилган.
Изоҳ (0)