Келиннинг ўқигани яхшими ёки уй ишларини билишининг ўзи етарлими? Баъзилар ўқиган келин ақл ўргатади деб қўрқса, айрим қайноналар ўқимишли келин зиёли набираларни тарбиялайди деб ҳисоблайди. Юртдошларимизнинг шу ҳақидаги фикрлари билан қизиқдик.
— Талаба қизни келин қиласизми?
— Албатта, келиннинг ўқимишли бўлгани яхши-ку. Илмли қизнинг дунёқараши кенг, фикрлаши юқори бўлади. Ўзим ўқиш тарафдориман, шунинг учун фақат талаба қизларни келин қиламиз, насиб қилса, деди йўловчи аёл.
— Айни вақтда талабани келин қилганмиз, уй ишларида ёрдам бериб ўқишига шароит яратиб беряпмиз, дея жавоб берди бухоролик онахон.
— Талабага уйланмайман, аёл киши тикиш-бичишни билишининг ўзи етарли. Ҳамманинг шахсий фикри бор, бўлажак аёлим болаларга қараб уйда ўтиради, дейди ёшроқ йигит.
— Талабанинг контракт тўлови, кунлик харажатлари бўлади. Ўқишига имкон яратиб берасизми ёки аёллар уйда ўтиргани яхшими?
— Ўқиган аёл кейинчалик ишлаб оиласига ёрдам беради, албатта, ўқитамиз. Ўзим нафақадаман, керак бўлса, шартнома пулини нафақамдан тўлаб бераман, дейди кекса аёл.
— Ҳозир шароитим йўқ, лекин талабага уйлансам, албатта, қўлимдан келганча тўловларини қоплашга ҳаракат қиламан, деди йўловчи йигит.
— Уйлансам, аёлим уйда ўтиради, кўчага чиқариб қўймайман. Ўқиши учун китоб ва бошқа керакли нарсаларни ўзим олиб келиб бераман, дея жавоб берди сотувчи йигит.
Сўровноманинг тўлиқ шаклини “Дарё” нинг YouTube’даги каналида томоша қилишингиз мумкин.
Изоҳ (0)