Ijtimoiy tarmoqlar orqali aktrisa Muhabbat Abdullayeva xalqqa murojaat qilib, yolg‘iz farzandi Tailandda avtohalokatga uchragani, uni kasalxonada davolatish uchun katta mablag‘ kerakligini aytib, xalqdan yordam so‘radi. “Daryo” muxbiri aktrisa bilan bog‘lanib, aslida vaziyat qanday bo‘lgani haqida so‘radi.
— Qizim Karina Tailandda doktorantura bo‘yicha o‘qib, amaliyot o‘tayotgan edi. U yerda mototsikl va velosipedlardan transport sifatida foydalaniladi. Mototsiklda ketayotganda boshqaruvni yo‘qotib, boshi bilan yiqilgan. O‘zi-ku hech narsani eslolmaydi, faqatgina transport vositasiga o‘tirganini biladi xolos.
31-mart kuni syomkada edim. Tailand elchixonasidagi bir yigit: “Qizingiz avariyaga uchradi, ahvoli og‘ir, komada”, deb xabar yozdi. Nima qilishimni bilmay qoldim. Syomkani to‘xtatay desam, hamma ishlaymiz deb kelgan. Gapiryapman-u, xayolim qizimda. Eng yomoni bunday vaziyatda farzand uzoqda bo‘lsa, juda qiyin ekan. Qanchalik xohlamay baribir o‘sha vaqtda qizimning yoniga borishim imkonsiz edi. Undan keyin elchixonadagi yigit qo‘ng‘iroq qilib, Karinaning ahvoli haqida gapirdi. Men tamoman shok holatiga tushib bo‘lgandim.
Karina yolg‘iz farzandim, juda kichikligidan boshlab til o‘rganishga qiziqqan. 18 yoshidan buyon Germaniyada yashaydi, bakalavrdan to doktoranturagacha o‘z kuchi bilan o‘qidi. Menga hech qachon qiyinchilik tug‘dirmagan, hamma muammolarini o‘z hal qilardi.
Avvaliga bu haqida aytishni istamadim, hammasini ichimga yutib, sabr qilishga harakat qildim. Ammo elchixona xodimi bu kasalxonada davolanish uchun kuniga 955 AQSH dollaridan to‘lov qilish kerakligini aytdi. Men teatr va kino aktrisasiman. To‘y xizmatlariga chiqmayman, daromadim ham u qadar yuqori emas. Shunda ham odamlardan uyalib, muammoga yechim izlashga harakat qildim. Imkonini qilolmagandan keyin qizim uchun xalqdan tilanib pul so‘rashga majbur bo‘ldim. Rosti shu kungacha birovdan yordam kutgan inson emasdim, ammo ona bolasi uchun tilanchilik qilishga ham rozi bo‘larkan.
Avtohalokat oqibatida qizimning yelkalari, qovurg‘asi va eng yomoni boshi jiddiy jarohat olgan. Birinchi operatsiyasi muvaffaqiyatli o‘tdi, endi keyingilariga tayyorlashyapti. Eng yomoni boshiga qon quyilgani va ochiq jarohatlari borligi uchun uni Toshkentga olib kelish ham imkonsiz ekan. Nima bo‘lgan taqdirda ham sog‘ayib, bag‘rimga qaytsin. Qizim endigina 37 yoshni qarshiladi. Nogiron bo‘lib qolmasin, deb duodaman.
Shu o‘rinda xalqimizga ham minnatdorlik bildiraman. Chunki eng qiyin vaziyatda meni qo‘llab-quvvatlashdi. Moddiy tomondan qo‘llab-quvvatlashyapti, duo qilishyapti. Bu menga kuch bag‘ishlaydi, — deydi aktrisa Muhabbat Abdullayeva.
Quyida videoni to‘liq holda tomosha qilishingiz mumkin.
Izoh (0)