“Хотира кундалиги” фильмида Элли образини гавдалантирган актриса Жена Роулендс вафот этди

Америкалик актриса Жена Роулендс 94 ёшида ҳаётдан кўз юмди. Бу ҳақда Variety нашрига таяниб “Правила жизни” хабар бермоқда.

Бундан роппа-роса 20 йил аввал Райан Гослинг ва Рейчел Макадамс иштирокидаги “Хотира кундалиги” фильмида актриса Элли Ҳемилтон ролини ижро этган. Фильм сюжетига кўра, воқеа қариялар уйида содир бўлади. У ерда кексайиб қолган жуфтлик — Ной Келҳаун ақли заифликдан азият чекаётган рафиқаси Элли Ҳемилтонга уларнинг ёшликдаги муҳаббати ҳақида ҳикоя қилади ва ҳаётининг энг ёрқин лаҳзаларини ёдга олади.

Фильм режиссёри Ник Кассаветис мазкур фильмга унинг карьерасига унчалик катта таъсир қилмайдиган навбатдаги мелодрама сифатида қараган эди. Шунинг учун у кекса Элли ролини ўйнайдиган актрисани танлаш вақти келганида ўз онасини таклиф қилди. Режиссёрнинг онаси Жена Роулендс ёшлигида жуда муваффақиятли актриса эди. Шу сабабли бу қарор бир овоздан маъқулланди.

Бироқ орадан 20 йил ўтгач, Кассаветис бу ролни онасига ишониб топширганидан афсусда эканини айтди. Жена ролни қойилмақом ижро этган бўлса-да, эндиликда унинг ҳаётида худди фильмдги воқеалар такрорлана бошлади: Жена хотирасини йўқотди ва Альцгеймер касаллигига чалинди. Бетоб актриса кексайганда кўп машаққатлар кўрди ва 14 август куни Калифорниядаги уйида 94 ёшида вафот этди.

Жорий йилнинг бошида унинг ўғли Ник Кассаветис онаси Альцгеймер касаллигидан азият чекаётганини маълум қилган эди.

“Онам сўнгги беш йил давомида ушбу касалликдан азият чекиб келмоқда. Ҳозирда у бутунлай ақлдан озган. Биз кечирган воқеалар ҳақиқий даҳшатдек эди. Ахир у аввалига буларнинг барчасини экранда яшаб ўтди, энди эса буларнинг бари ҳаёт ҳақиқатининг бир қисмига айланди”, деган эди Ник Кассаветис.

1950 йилларда Роулендс театр ва телевидение соҳасида фаолиятини бошлади. Кейин актриса бир нечта телесериалларда: “87-участка”, “Бонанза” ва “Альфред Ҳичкок тақдим этади” каби лойиҳаларда иштирок этди.

Жена Роулендс ҳаёти давомида юздан ортиқ фильмларда, жумладан, “Ердаги тун”, “Глория” ва “Ўзида бўлмаган аёл” фильмларида суратга тушган. У тўрт карра “Эмми” мукофоти, иккита “Олтин глобус” мукофотини олган, шунингдек, “Ўзида бўлмаган аёл” ва “Глория” фильмларидаги роли учун “Оскар”га номзод бўлган.