Миллардер Илон Маск 12 август куни ўзига тегишли Х тармоғида президентликка Республикачилар партиясидан номзод Дональд Трамп билан интервью ташкил этган. Бу ҳақда Reuters нашри хабар берди.
Манбада айтилишича, интервью бошланишидан олдин Х тармоғида жуда кўплаб носозликлар ва узилишлар кузатилган. Шу сабабли режалаштирилган учрашувни бошлаш 40 дақиқага кечиккан.
Илон Маск юз берган тармоқ узилишларини киберҳужум дея баҳолаган. Номаълум манбалар Трамп ва Маск интервьюси чиппакка чиқиши учун ушбу ҳужумни уюштиргани айтилган.
Интервью умумий ҳисобда 2 соатдан ортиқ давом этган. Бутун Х платформасида 1,3 миллион обуначи интервьюни фаол равишда кузатиб борган.
Интервью икки таниқли шахснинг бир-бирига узундан узоқ мақтовлари билан бошланган. Суҳбат аввалида Илон Маск Трампни суиқасд пайтида кўрсатган иродаси учун “жасоратли” шахс деб атаган.
Суҳбат давомида халқаро сиёсат, сайлов кампанияси ва президентликка номзоднинг шахсий ҳаётига дахлдор кўплаб масалалар кўрилган. Трампнинг содир бўлаётган воқеаларга муносабатини билишга ҳаракат қилинган.
Трамп агар сайловда ғалаба қозонса, Путин билан тил топишишга умид қилаётганини айтган. Бу Москва учун ҳам, Вашингтон учун ҳам энг манфаатли қарор бўлиши айтилган.
Ўз нутқида Трамп Байденни Шарқий Европада муаммо келтириб чиқаришда айблаган. Республикачилар номзоди сўзларига кўра, Киевни НАТОга чорлаш “аҳмоқона” қарор бўлган. Бунинг ўрнига Путин билан музокара олиб бориш ҳарбий эскалациянинг олдини олган бўларди.
Трамп сайловдаги рақиблари ҳақида ҳам фикрлар билдирган. У Камала Ҳаррисни сайлов пойгаси борасида Байдендан кўра муваффақиятсизроқ деб ҳисоблашини айтган. Байденнинг ўзини эса давлат бошқаруви борасида ҳеч қандай ақлий салоҳиятга эга эмасга чиқарган.
Дональд Трамп, шунингдек, АҚШ учун ташқи хавф кучайишини тахмин қилган. Собиқ президент Хитой ядровий арсенал ҳажми борасида АҚШдан ўзиб кетиши мумкинлиги айтган. Бунга қарши туриш учун ҳарбий бюджетни қайта кўриб чиқиш, Исроилдаги каби “Темир гумбаз” тизимларини қуриш зарурлиги айтилган.
Республикачилар номзоди ҳар қандай ҳолатда ҳам Россия ва Хитой яқинлашувига йўл қўйиб бўлмаслиги ҳақида гапирган. Бу амалга ошса, АҚШ учун қийин кунлар бошланиши маълум қилинган.
Изоҳ (0)