Украина президенти Владимир Зеленский Россия позицияларидан 2,5 километр узоқликда Fox News телеканали бошловчиси Брет Байерга интервью берди. BBC интервьюнинг қисқача тафсилотларини келтириб ўтди.
Зеленский Байерни Купянск яқинидаги Харьков вилоятига таклиф қилгани рамзий маънога ҳам эга. Уруш бошида рус қўшинлари бу шаҳарни, шунингдек, Харьков вилоятининг муҳим ҳудудларини эгаллаб олишга, шунингдек, у ерда ўз маъмуриятини ўрнатишга муваффақ бўлди. Аммо Украина қуролли кучлари босиб олинган ҳудудининг катта қисмини қайтариб олди.
Путиннинг Карлсонга берган интервьюси ҳақида
Fox News бошловчиси Зеленскийдан Путиннинг интервьюсини томоша қилдингизми, деб сўраганида Украина президенти шундай жавоб берди:
“Биз ҳақимизда, уруш ҳақида, АҚШ ҳақида икки соат давомида бемаъни гапларни тинглашга вақтим йўқ”.
Украинанинг режалари
Зеленский Украинанинг 2024 йилга қандай режалари борлиги билан бўлишди. Журналист агар АҚШ маблағ ажратмаса, бу қандай давом этишини сўради.
“Сўнгги ойларда шунга ўхшаш саволларни тез-тез эшитаман. Биз омон қоламизми? Албатта. Лекин ҳаммамиз ҳам эмас. Агар дунё бунга тайёр бўлса, буни кўрасиз. Аммо бу фожиа ҳисобланади. Нафақат Украина, украиналиклар, балки бутун Европа учун фожиа бўлади”, — деди у.
АҚШ ёрдамининг узилиши эҳтимоли
Уруш бошланганидан бери Украинанинг халқаро ҳамкорлари унга қарийб 170 миллиард евро миқдорида ёрдам ажратишга ваъда берди. Ушбу маблағнинг 40 фоизи соф ҳарбий ёрдам, 50 фоизи молиявий ёрдам, тахминан 10 фоизи гуманитар ёрдамдир. 42 давлат донор бўлди, аммо уларнинг орасида 71 миллиард евролик ёрдам кўрсатган асосийси, албатта, АҚШ эди.
“Биз баъзи параллел йўлларни топмагунимизча омон қолишимиз керак. Лекин ҳар қандай ҳолатда ҳам АҚШ ёрдами жуда муҳим. Шундай экан, усиз, кечирасиз, касалхоналарда қаҳрамон йигитлар кўпайиб бораверади. Чунки сизда ҳақиқий мудофаа қалқони ва ўқ-дорилар билан тенг даражада кучли артиллерия бўлмаса, сиз одамларни йўқотасиз”, — деди Зеленский.
У агар АҚШ бу йил таъминотни қайта тикламаса, “Б” режаси нима бўлишини тушунтирмади, лекин Россия ҳали ҳам осмонда ва сонда устунликка эга эканини таъкидлади.
Россия ва Путин ҳақида
“Ушбу урушга иккита нуқтайи назар бўлиши мумкин эмас. Биргина душман бор, бу — Путин. Танклар билан халқимизни йўқ қилиш музокара ҳисобланмайди. Макрон (Франция президенти) ва Шольц (Германия канцлери) уруш бошланишидан олдин Путин билан гаплашган. У ҳеч қандай босқин бўлмаслигини таъкидлаган. Шундай экан, у нима демасин, бунга ишонолмайсиз.
Украиналиклардан уруш қачон тугашини сўраш унчалик адолатли эмас. Биз у тугаши учун қўлимиздан келган ҳамма нарсани қиламиз. Аммо ростини айтайлик: дунё Путиннинг мағлубиятига унчалик тайёр эмас. Дунё Россиядаги ўзгаришлардан қўрқади. Шундай экан, қачонки Путин барча қизил чизиқларни босиб ўтганини, у бутун дунёга таҳдид соладиган, НАТОни йўқ қилиш режаси бўлган адекват шахс эмаслигини тушунганида уруш тугайди”, — деди Зеленский.
Россиянинг йўқотишлари юқорироқ
Президентнинг сўзларига кўра, Украина ва Россия ҳарбий йўқотишларининг нисбати бирдан бешга тенг.
“Ўн минглаб ўлимлар. Ўн минглаб одамлар чиқариб юборилди. Бу нисбат бирдан бешга тенг. Жангда ҳалок бўлган ҳар бир аскаримизга беш нафар рус аскари тўғри келади”, — деди Зеленский, аммо аниқ рақам айтмади.
Изоҳ (0)