Marvel студияси фильмларининг рейтинги вақт ўтгани сари ўзгариб боради. Буни Business Insider журналистлари тасдиқлади. Улар Rotten Tomatoes танқидий ресурсида Marvel оламининг энг оммабоп лойиҳаларини таҳлил қилди ва янги рейтингни тузди.
Мазкур рейтингга сўнгги 38 йил ичида суратга олинган 83 та фильм киритилди. Уларнинг аксарияти улкан касса тушумларига эга бўлишига қарамай, кино танқидчиларининг барчасига бирдек манзур бўлмади.
Business Insider нашри 2015 йилда экранларга қайтган “Фантастик тўртлик” фильмининг иккинчи қисмини Marvel студияси тарихидаги энг ёмон фильм деб атади. Ремейк атиги 9 фоиз ижобий баҳоларни олди. Ўргимчак одамнинг спин-оффи бўлган “Ўргимчак хоним” фильми ҳамда “Электра” рейтингнинг қуйи поғонасидан жой олди. Танқидчилар уларни 11 фоиз ижобий баҳолади.
80-ўрин Marvel’нинг биринчи лойиҳаси “Говард исмли ўрдак” фильмига насиб этди. Лойиҳа 13 фоиз овоз олди. Жаред Лето иштирокидаги “Морбиус” эса атиги 15 фоиз тўплади.
Рейтингда юқори поғоналарни эгаллаган лойиҳаларга келсак, Майлз Моралес ҳақидаги иккита анимацион лойиҳа биринчиликни қўлга киритди: “Ўргимчак одам: оламлар тўри” фильми 95 фоиз баҳо билан кучли учталикка кирди.
“Ўргимчак одам: оламлар бўйлаб” фильми 97 фоиз тўплаб, рейтингда биринчи ўринни эгаллади. Энг яхши фильмлар рўйхатига “Қора пантерра” ҳам киритилди. Танқидчилар томонидан лойиҳа 96 фоиз баҳоланди. Кейинги икки ўринни “Қасоскорлар: Финал” ва “Темир одам” фильмлари эгаллади.
Изоҳ (0)