Япония бош вазири идораси мамлакатда юз берган зилзила туфайли Марказий Осиёга амалга оширилиши режалаштирилган давлат ташрифини бекор қилиш имкониятларини кўриб чиқмоқда. Бу ҳақда япон маҳаллий нашрларига таяниб, Reuters хабар берди.
Манбада айтилишича, ҳозирда мамлакатда зилзила хавфи максимал даражага етган. Таҳлилчилар Япония жануби ҳамда ғарбий соҳиллари бўйлаб йирик силкинишлар бўлиши мумкинлиги, цунами юзага келиши хавфидан огоҳлантирган.
Мамлакатга яқинлашиб келаётган фавқулодда ҳолат эса бош вазир Фумио Кисидани Марказий Осиёга ташрифни бекор қилишга ундаган. Ҳозирда мамлакат расмийлари сафарни бекор қилиш ва унда муҳокама қилинадиган мавзуларни онлайн форматга ўтказиш устида иш олиб бораётгани айтилган.
Фумио Кисида олдиндан эълон қилинган режа асосида Қозоғистон, Ўзбекистон ва Мўғулистонга 9—12 август кунлари давлат ташрифлари амалга ошириши керак эди. Ушбу ташрифларда савдо-иқтисодий ҳамда бир қатор ўзаро икки томонлама ҳамкорлик масалалари кўриб чиқилиши белгиланган.
Япония метеорология агентлиги 8 август куни кучли зилзилалар юзага келиши мумкинлиги ҳақида баёнот берган. Аҳоли уйларини тарк этмасликка ва вилоятлар бўйлаб сафарга чиқмасликка чақирилган. Агентлик вилоятлардаги ҳукуматларни энг ёмон сценарий рўй берган тақдирда фавқулодда эвакуацияга тайёрланишга чақирган.
Маълумот ўрнида, 8 август куни Япония жанубидаги Кюсю ва Сикоку оролларида иккита 7 балли зилзила кузатилган эди. Оқибатда жойларда аҳоли ва маҳаллий ҳокимият иншоотларига зарар етган. Денгиз соҳилига яқин ҳудудларда цунами хавфи эълон қилинган.
Изоҳ (0)