Yaponiyaning ikki prefekturasida 8-avgust tongida zilzila kuzatilgan. Bu haqda yapon mahalliy nashrlariga tayanib, Daily Mail xabar berdi.
Manbada aytilishicha, zilzila Yaponiya janubidagi Kyusyu oroli sohillarida yuzaga kelgan. 6,9 va 7,1 balli zilzilalar orolning bir-biriga qarama qarshi ikki burchagida qayd etilgan.
Tabiiy ofatlar oqibatlarini o‘rganish bilan shug‘ullanuvchi bir guruh mutaxassislar sunami xavfidan ogohlantirgan. Aholini bo‘lg‘usi halokatlardan himoya qilish uchun umumiy evakuatsiya boshlash tavsiya qilingan.
Birinchi yer tebranishi qayd etilgan Miyazaki shahrining Xyuga hududida poyezdlar harakati to‘xtatilgan. Mahalliy hokimiyat aholi vakillariga favqulodda holatga tayyorlanishni buyurgan.
Zilzilalar Kyusyudan tashqari qo‘shni Sikoku orolida ham sezilgan. Orol janubidagi bir qator bino va inshootlari darz ketgan. Mahalliy aholi vakillari orasida hodisa oqibatida jarohatlanganlar bo‘lgan.
Yaponiya hukumati rasmiylari zilziladan so‘ng mamlakatning Kagoshima shahridagi Senday atom elektr stansiyasida tekshiruv o‘tkazishni buyurgan. Sunami xavfi hukumatni 2011-yildagi Fukusima AES halokati haqida eslashga undagan. Senday AESda olib borilgan tezkor o‘rganishlar hech qanday xavfli o‘zgarish sodir bo‘lmaganini ko‘rsatgan.
Izoh (0)