Япониянинг икки префектурасида 8 август тонгида зилзила кузатилган. Бу ҳақда япон маҳаллий нашрларига таяниб, Daily Mail хабар берди.
Манбада айтилишича, зилзила Япония жанубидаги Кюсю ороли соҳилларида юзага келган. 6,9 ва 7,1 балли зилзилалар оролнинг бир-бирига қарама қарши икки бурчагида қайд этилган.
Табиий офатлар оқибатларини ўрганиш билан шуғулланувчи бир гуруҳ мутахассислар цунами хавфидан огоҳлантирган. Аҳолини бўлғуси ҳалокатлардан ҳимоя қилиш учун умумий эвакуация бошлаш тавсия қилинган.
Биринчи ер тебраниши қайд этилган Миязаки шаҳрининг Хюга ҳудудида поездлар ҳаракати тўхтатилган. Маҳаллий ҳокимият аҳоли вакилларига фавқулодда ҳолатга тайёрланишни буюрган.
Зилзилалар Кюсюдан ташқари қўшни Сикоку оролида ҳам сезилган. Орол жанубидаги бир қатор бино ва иншоотлари дарз кетган. Маҳаллий аҳоли вакиллари орасида ҳодиса оқибатида жароҳатланганлар бўлган.
Япония ҳукумати расмийлари зилзиладан сўнг мамлакатнинг Кагошима шаҳридаги Сендай атом электр станциясида текширув ўтказишни буюрган. Цунами хавфи ҳукуматни 2011 йилдаги Фукусима АЭС ҳалокати ҳақида эслашга ундаган. Сендай АЭСда олиб борилган тезкор ўрганишлар ҳеч қандай хавфли ўзгариш содир бўлмаганини кўрсатган.
Изоҳ (0)