Россияда юқумли “Ғарбий Нил” иситмаси аниқланди

Россияда Ғарбий Нил иситмаси билан касалланишнинг айрим ҳолатлари қайд этилмоқда. Бу ҳақда “Роспотребнадзор” хабар берди.

“Мутахассислар Россияда, шунингдек, хорижда Ғарбий Нил иситмаси бўйича доимий мониторинг олиб бормоқда. Жорий йилда Россияда касалланишнинг камдан-кам ҳолатлари қайд этилган, уларнинг аксарияти четдан келтирилган”, дейилади хабарда.

Бу йил Исроилда Ғарбий Нил иситмаси вируси билан касалланиш 25 йил ичида рекорд даражада қайд этилди. Жумладан, 440 киши касалланди, улардан 32 нафари вафот этган.

• Ғарбий Нил иситмаси — иссиқ иқлимли мамлакатларда, масалан, Миср, Греция, Исроил, Таиланд, Вьетнам, Ҳиндистон ва Африканинг бошқа давлатлари, Осиё, Европа ва Шимолий Америкада тарқалган юқумли касаллик.

Касалланганларнинг аксариятида (70-80 фоиз атрофида) у симптомсиз ўтади, тахминан 20 фоизида иситма, бош оғриғи, тана ва бўғимларда оғриқ, қусиш, диарея ёки тошма кузатилиши мумкин. Касаллик беморларнинг бир фоиздан камроғида оғир кечади.

Инфекция манбаи қушлар (қарғалар ёки каптарлар) бўлиши мумкин, лекин асосан қон сўрувчи ҳашаротлар, биринчи навбатда чивинлар орқали юқади. Эҳтиёт чораси сифатида турли репеллентлар — ҳашаротларни узоқлаштирадиган воситалардан фойдаланиш тавсия этилади.