Венесуэла президенти Мадуро Европа Иттифоқига ультиматум эълон қилди

Венесуэла президенти Николас Мадуро Европа Иттифоқининг санкциялар сиёсати давом этадиган бўлса, ҳар қандай диалогдан воз кечиш билан таҳдид қилди, деб ёзмоқда «РБК».

«Венесуэла ўз қадр-қимматига эга ва у қаердан уюштирилганидан қатъи назар ҳужумларга қандай жавоб беришни билади», — деди Венесуэла раҳбари.

Мадуро Каракаснинг Евроиттифоқ билан яхши алоқада бўлиш истагида эканини таъкидлади, аммо у венесуэлаликларга қарши «кимдир келиб ҳужум қилиш, ҳақорат қилиш, санкциялар киритиши»га рози эмас. «Биз бирор кимнинг бу каби хатти-ҳаракатига тоқат қилмаймиз», — деди Мадуро.

Маълумот учун 22 февраль куни Европа Иттифоқи Венесуэла расмийларига қарши янги санкциялар эълон қилди. Чекловлар 19 нафар мансабдор, жумладан Миллий сайлов кенгаши президенти Индира Алфонсо, кенгаш вице-президенти Леонардо Моралес, Қуролли кучлар стратегик операциялар қўмондонлиги раҳбари, адмирал Ремихио Себалос Ичасо, шунингдек, Миллий ассемблея аъзолари ва судьяларга нисбатан жорий этилди.

Бунга жавобан Венесуэла ҳукумати 24 февраль куни Евроиттифоқ элчиси Исабел Брилянте Педросони «хуш кўрилмаган инсон» деб эълон қилди ва унга мамлакатдан чиқиб кетиш учун 72 соат муҳлат берди.

Брюссель Венесуэланинг дипломатни чиқариб юбориш тўғрисидаги қароридан афсусда эканини билдирди ва уни қайта кўриб чиқишга чақирди. Евроиттифоқнинг фикрича, Каракаснинг бундай хатти-ҳаракатлари фақат мамлакатни янада яккаланишига олиб келади.

Эслатиб ўтамиз, президент Николас Мадуро бир куни шаҳар автобус ҳайдовчиси касбига қайтиш умиди борлигини айтган. «Умид қиламанки, бир куни президентлик лавозимидан кетганимда, мен ушбу соҳага бошимни тик тутганча, униформам билан қайтиб бораман, автобус миниб кўчага чиқаман ва Венесуэла халқига оддий ишчи сифатида хизмат қиламан», — деган президент VTV канали эфирида намойиш этилган транспорт соҳаси ишчилари билан учрашувда.

Николас Мадуро ўрта маълумотни анча улғайган ёшида олган: у норозилик намойиши уюштиргани учун мактабдан ҳайдалган. Ўсмирлик давридаёқ сўл партия фаоли эди, кейинчалик автобус ҳайдовчиси ва Каракас метроси ишчиларининг касаба уюшмаси аъзоси бўлди. Гавана мактабида олган таълими ватанидаги сиёсий карьерасига пойдевор бўлган.

Аввалроқ Венесуэла президенти Николас Мадуро истеъфога чиқишга тайёрлигини билдиргани ҳақида хабар берилган эди.