АҚШ вице-президенти Камала Ҳаррис президентлик сайловларида иштирок этишини маълум қилди. Бу ҳақда CNN хабар берди.
Сиёсатчи сайловда ғалаба қозониш учун қўлидан келган ҳамма нарсани қилишини таъкидлади. Шу билан бирга, у Жо Байденнинг ўз номзодини қайтариб олиш қарорини фидокорона ва ватанпарварлик ҳаракати деб атади.
Президентнинг қўллаб-қувватловини олганимдан фахрланаман ва бу номинациясни қўлга киритиш ва ғалаба қозониш ниятидаман. Сайлов кунига 107 кун қолди. Биргаликда курашамиз ва биргаликда ғалаба қозонамиз, деган Ҳаррис.
АҚШ вице-президенти Байденнинг сайловда қатнашмаслик қарорига ҳам муносабат билдирган.
Мазкур беғараз ва ватанпарварлик ҳаракати билан Байден ўз ҳаёти давомида қилган ишни амалга оширди: Америка халқи ва мамлакатни ҳамма нарсадан устун қўяди. Мен Демократик партияни ва миллатимизни бирлаштириб, Дональд Трамп ва унинг 2025 йилдаги экстремал лойиҳасини мағлуб этиш учун қўлимдан келганини қиламан, деди у.
Байден сайловда қатнашмайди
21 июль куни Жо Байден президентлик сайловидан ўз номзодини қайтариб олди. Сиёсатчи партия ва мамлакат манфаатларига асосан шундай қарорга келганини айтди.
Сизнинг президентингиз сифатида хизмат қилиш ҳаётимдаги энг катта шараф бўлди. Мен қайта сайланиш ниятида бўлган бўлсам-да, ўз партиям ва мамлакатим манфаатларига кўра, номзодимни рад этишим ва қолган муддат давомида фақат президентлик вазифамни бажаришга эътибор қаратишим керак деб ҳисоблайман, деган у.
Байден президентлик пойгасида Камала Ҳаррисни тўлиқ қўллаб-қувватлашини билдирди. Унинг таъкидлашича, демократлар Трампни сайловларда мағлуб этиш учун ҳозир бирлашиши керак.
АҚШ Конгресси Вакиллар палатаси спикери Майк Жонсон қарор ортидан Байденни истеъфога чиқишга чақирди. Унинг фикрича, кейинги муддатга президент бўлишни истамаган одам ҳозир бу лавозимни эгалламаслиги лозим.
Изоҳ (0)