Ўзбекистонда Chevrolet Lacetti автомобили ишлаб чиқариш тўхтатилди. Бу ҳақда UzAutoMotors хабар берди.
Қайд этилишича, Асака заводи конвейеридан энг охирги — 487 104 чи Chevrolet Lacetti ишлаб чиқарилди.
“У тарихда энг охирги Lacetti (Gentra) бўлиб муҳрланди. Ўтган 10 йил давомида у кўплаб автомобиль ихлосмандлари учун ишончли ва қулай бўлиб, халқ автомобилига айланиб улгурди”, дейилади компания хабарида.
Lacetti Асака заводида 2013 йилдан ишлаб чиқарила бошланган. Автомобиль дастлабки йилларда 11 222 дона ишлаб чиқарилган бўлса, 2023 йилда бу кўрсаткич 89 565 донага етган.
2023 йил декабрда компания 2024 йилдан бошлаб Lacetti ишлаб чиқаришни бутунлай тўхтатишини билдирганди. Бироқ жорий йил май ойида ҳам Chevrolet Lacetti ишлаб чиқариш тўхтатилмагани маълум бўлган.
“Lacetti ишлаб чиқариш қачонгача давом этишини аниқ айта олмайман. Бу бирданига тўхтамайди. Яқин 7 кун ичида харидорларга яна шартнома берилиши ёки берилмаслиги ойдинлашади, дея маълум қилган “Ўзавтосаноат” вакили.
UzAutoMotors сўнгги марта 2024 йил 21 май куни ҳеч қандай эълонсиз 3 600 та Chevrolet Lacetti автомобиллари учун шартномалар тузган. Бундан аввал эса 8 май куни (7 майда эълон берилган) аввалги автомобиллар хариди учун тузилган шартномалардан чиқарилган ҳажмдан 4 500 дона Lacetti’га шартнома берилган.
Статистика агентлиги хабарига кўра, 2024 йил январь–июнь ойларида UzAutoMotors 12 635 дона Gentra ишлаб чиқарган.
Изоҳ (0)