Ўзбекистон аҳолисининг умумий даромадлари ошгани маълум қилинди 

Ўзбекистон аҳолисининг ярим йиллик даромадлари реал ўсиши 8,6 фоизга етиб, жон бошига 10,8 миллион сўмдан тўғри келди. Бу ҳақда Статистика агентлиги маълумот берди.

Жорий йил январь—июнь ойларида мамлакат аҳолининг умумий даромадлари 399,2 триллион сўмни ташкил этди. Бу кўрсаткич 2023 йил мос даврида 338,4 триллион сўм бўлган.

Ярим йил мобайнида аҳоли умумий даромадларининг номинал номинал ўсиши 18,4 фоизга, реал ўсиш суръати 8,6 фоизга етди. Ҳисобот даврида аҳоли жон бошига умумий даромадлар 10,8 миллион сўмдан тўғри келди.

Таққослаш учун, ўтган йилнинг биринчи ярмида аҳоли даромадларининг реал ўсиши 6,5 фоиз бўлиб, жон бошига даромадлар 9,3 миллион сўмни ташкил этган.

Жорий йил биринчи ярмида аҳоли жон бошига умумий даромадлар ҳажмида Тошкент шаҳри (28,7 миллион сўм) етакчилик қилган. Шу билан бирга, Навоий (16,6 миллион сўм), Бухоро (11,8 миллион сўм), Тошкент (10,8 миллион сўм) вилоятларида ўртача республика даражасидан юқори кўрсаткичлар қайд этилган.

Аҳоли жон бошига умумий даромадлар ҳажмининг энг қуйи кўрсаткичлари Қорақалпоғистонда (7,2 миллион сўм), Наманган (7,4 миллион сўм) ва Сурхондарё (8 миллион сўм) вилоятларида кузатилган.

Аҳоли умумий даромадлари таркибининг 29,9 фоизи ёлланма ишчилар даромадларига тўғри келди. Қолган 30,7 фоиз улуш мустақил равишда банд бўлишдан, 27,8 фоизи трансфертлардан олинган даромадлардан келган.

Ҳудудлар бўйича аҳоли умумий даромадлари таркибида меҳнат фаолиятидан олинган даромадларнинг энг юқори улуши Навоий (76,3 фоиз), Тошкент (73,7 фоиз), Жиззах (71,4 фоиз) вилоятларида кузатилди. Аксинча, Самарқанд, водий вилоятлари ва Тошкент шаҳри ўртача республика даражасидан паст кўрсаткични ташкил этди.

Олти ой давомида мамлакат аҳолиси мол-мулкдан 14,3 триллион сўм даромад олган. Бу умумий даромадлар таркибининг 3,6 фоизига тенг.

Ярим йил мобайнида трансфертлардан олинган даромадларнинг 37,1 фоизини ижтимоий трансфертлардан тушумлар ташкил қилган. Ижтимоий трансфертлар таркибида пенсиялар энг кўп улуш — 79,1 фоизни, нафақалар 19 фоизни, стипендиялар 1,9 фоизни ташкил этди.