Ўзбекистонга транспорт инқирози олиб келиши мумкин бўлган муаммоларни бартараф этиш учун 11 миллиард доллар керак. Бу ҳақда Тошкент давлат транспорт университети профессори Дауренбек Илесалиев айтиб ўтди.
Ундан аввал халқаро транспорт ва логистика соҳасидаги россиялик эксперт Алексей Безбородов ЛогиСтан Telegram каналига берган интервьюсида яқин икки йилда Ўзбекистон транспорт саноати инқирозга юз тутишини, бунга сабаб логистика ишлаб чиқаришнинг ўсишига монанд кетмаётганини айтганди.
Алексей Безбородовнинг фикрича, инқироз оқибатларини бартараф этиш учун 50 миллиард доллар талаб этилади. Ўзбекистонлик эксперт Дауренбек Илесалиев эса бунга 11 миллиард доллар маблағ етарли деган фикрда.
Унинг таъкидлашича, ҳақиқатдан ҳам транспорт, саноат ва қишлоқ хўжалиги соҳалари вакиллари дефицитга дуч келмоқда. Вазиятга технологик тақчиллик ҳам таъсир кўрсатяпти.
“Бу, айниқса, йиғим-терим ва ҳосилни етказиб бериш қизғин палласига тўғри келади. Бундай пайтларда мева-сабзавот юкларини етказиб беришда нархларнинг ошиши кузатилмоқда”, — дейди Дауренбек Илесалиев.
Экспертнинг айтишича, Ўзбекистондаги назорат-ўтказиш пунктлари Қирғизистонга нисбатан илғор инфратузилмага эга. Ўзбекистон Республикасида айрим назорат-ўтказиш пунктларида кутиш вақти камайди.
Дауренбек Илесалиев Ўзбекистонда транспорт-логистика соҳасидаги муаммоларни ҳал этиш учун аввало бу муаммони оммалаштириш, давра суҳбатлари, конференция ва бошқа тадбирлар ташкил этишиб, масалаларга эътиборни қаратиш ва биргаликда ечим топиш лозим.
Изоҳ (0)