Статистика агентлиги 2024 йил январь–июнь ойларида ўзбекистонликлар қайси мамлакатларга доимий яшаш учун кўчиб кетганини маълум қилди.
Ташқи миграция
Дастлабки ярим йил давомида беш минг нафардан ортиқ Ўзбекистон фуқаролари қатор давлатларга доимий яшаш мақсадида кўчиб кетган.
Кўчганларнинг асосий қисми — 4 128 киши (умумий улушнинг 81,5 фоизи) Қозоғистонга кетган. Шу билан бирга, Россияга 760 киши, Қирғизистонга 34 киши, Жанубий Кореяга 37 киши, Туркманистонга 14 киши, бошқа давлатларга 93 киши доимий яшаш мақсадида кўчган.
Таққослаш учун, 2023 йилнинг биринчи ярмида Ўзбекистондан хорижий мамлакатларга доимий яшаш учун кўчиб кетганлар сони 9 минг нафардан ортиқ бўлган. Хусусан, Қозоғистонга 7 080 киши, Россияга 1 584 киши кўчиб борган.
Хориждан Ўзбекистонга кўчишлар
Ўзбекистонга январь–июнь ойларида хорижий мамлакатлардан 1 080 киши доимий яшаш мақсадида кўчиб келган. Уларнинг асосий қисми Россия (36,1 фоиз) ва Қозоғистон (24,1 фоиз) фуқаролари ҳиссасига тўғри келган. Жумладан, 6 ой ичида республикага:
- Россиядан 390 киши;
- Қозоғистондан 260 киши;
- Қирғизистондан 78 киши;
- Тожикистондан 116 киши;
- Туркманистондан 22 киши;
- Бошқа давлатлардан 214 киши доимий яшаш учун кўчиб келган.
Таққослаш учун, 2023 йил январь–июнь ойларида чет элдан Ўзбекистонга 1 581 киши доимий яшаш мақсадида кўчиб келган. Ўшанда ҳам Россия (582 киши) ва Қозоғистондан (382 киши) энг кўп одам Ўзбекистонда яшашни танлаган.
Ички миграция
Жорий йилнинг биринчи ярмида мамлакат миқёсида бир ҳудуддан бошқасига кўчиб келганлар сони 116,6 минг кишини ташкил этди (2023 йил мос даврида 106,3 минг киши). Шундан эркаклар 50,7 минг нафар, аёллар 65,9 минг нафардир. Кўчиб келганлар сони шаҳарларда 87 минг киши, қишлоқларда 29,6 минг киши бўлган.
Ярим йил ичида кўчиб келганларнинг энг кўп улуши Тошкент шаҳрида (44 605 киши), энг кам улуши Наманган вилоятида (1 649 киши) қайд этилди.
Олти ой давомида республика бўйлаб кўчиб кетганлар сони 120,6 минг кишини ташкил этди (2023 йил мос даврида 113,7 киши бўлган). Шундан эркаклар 52,8 минг нафар, аёллар 67,8 минг нафар. Кўчиб кетганлар сони шаҳарларда 83,9 минг киши, қишлоқларда 36,7 минг киши.
Кўчиб кетганларнинг энг кўп улуши Тошкент шаҳри (35 540 киши), энг кам қисми Наманган вилояти (2 710 киши) ҳиссасига тўғри келди.
Изоҳ (0)