Тожикистон ва Афғонистондан олиб келинган наркотикларни Ўзбекистонда сотмоқчи бўлганлар ушланди (видео)

Давлат хавфсизлик хизмати ходимлари томонидан ўтказилган тезкор тадбирларда Тожикистон ва Афғонистондан контрабанда йўли билан олиб келинган 78 кило гиёҳвандлик воситаси мусодара қилинди.

Маълум қилинишича, Тожикистоннинг Панжикент тумани билан чегарадош бўлган Самарқанд вилоятининг Ургут туманида гиёҳвандлик воситалари контрабандаси билан шуғулланувчи 1 нафар Тожикистон ва 6 нафар Ўзбекистон фуқароларидан иборат жиноий гуруҳ фаолиятига чек қўйилди.

Тезкор тадбир давомида гуруҳ аъзоларидан қўшни давлатдан айланма йўллар орқали олиб келинган 11 килограмм 502 грамм опий моддаси процессуал тартибда расмийлаштириб олинди. Шунингдек, улардан 2600 доллар, 12 миллион 690 минг сўм ва 850 сомони ҳам ашёвий далил сифатида ҳужжатлаштириб олинди.

Аниқланишича, улар Тожикистондан келтирилган ушбу наркотикни Ўзбекистонда сотишни режалаштиришган.

Тошкент вилоятининг Янгийўл туманида 1985 йилда туғилган Қозоғистон фуқароси тўхтатилиб, унинг юк сумкаси кўздан кечирилганда, сумка ичида 46 килограмм 738 грамм гашиш моддаси борлиги аниқланиб, процессуал тартибда расмийлаштириб олинди.

Шунингдек, тезкор тадбир давом эттирилиб, унинг жиноий шериги бўлган, 1976 йилда туғилган Тожикистон фуқароси ҳамда ҳайдовчилик фаолияти билан шуғулланувчи, 1964 йилда туғилган Ўзбекистон фуқароси ҳам ушланди. Аниқланишича, мазкур гиёҳвандлик воситаси Афғонистондан контрабанда йўли билан олиб келинган.

Тошкент—Фарғона йўналишида ҳаракатланаётган Gentra Поп тумани ҳудудида жойлашган ЙПХ масканида тўхтатилиб, кўздан кечирилганда, Марғилон шаҳрида яшовчи, 1996 ва 2001 йилларда туғилган ака-ука кетаётган автомашина салонида 19 килограмм 885 грамм гашиш моддаси борлиги маълум бўлди.

Шунингдек, ака-уканинг жиноий шериги бўлган ва бошқа автомашинада уларни кузатиб бораётган, Марғилон шаҳрида яшовчи, 1998 йилда туғилган шахс ҳам қўлга олинди.

Терговга қадар текширув давомида улар муқаддам тожикистонлик наркокурьерлар томонидан Тошкент вилоятининг Оҳангарон тумани ҳудудидаги хуфия жойга қолдириб кетилган наркотик моддаларни олиб кетаётгани маълум бўлди.

Ҳозирда учала ҳолат юзасидан мазкур шахсларга нисбатан Жиноят кодексининг 246 ва 273-моддалари билан жиноят ишлари қўзғатилиб, қамоқ эҳтиёт чораси қўлланилган. Тергов ҳаракатлари олиб борилмоқда.