Ўзбекистонда икки ойда қарийб 1 155 та оилавий боғча ташкил этилди

Мактабгача ва мактаб таълими вазирлиги 2024 йилнинг май—июнь ойларида республика бўйича ташкил этилган оилавий нодавлат мактабгача таълим муассасалари ҳақида маълумот берди.

Қайд этилишича, ушбу муддатда мамлакатда умумий ҳисобда 1 155 та оилавий нодавлат мактабгача таълим муассасаси ташкил этилган. Энг кўп боғча Наманган вилоятида очилган — 206 та. Фарғона вилоятида — 189 та, Самарқанд вилоятида эса 141 та оилавий боғча очилган.

Икки ой ичида энг кам оилавий боғча ташкил этилган ҳудуд эса Қашқадарё вилояти — 21 та. Хоразм вилоятида — 22 та, аҳоли нисбатан кам яшайдиган ҳудудлар — Навоий ва Сирдарё вилоятларида мос равишда 37 та ва 63 та оилавий боғча ташкил этилган.  

Туманлар кесимида Наманган вилоятининг Тўрақўрғон ва Уйчи туманлари етакчилик қилган: ушбу ҳудудларда мос равишда 36 та ва 35 та оилавий нодавлат мактабгача таълим муассасаси ташкил этилган.

• Аввалроқ Мактабгача ва мактаб таълими ташкилотлари ходимларини касбий ривожлантиришнинг янгича тизими йўлга қўйилиши тўғрисида хабар берилганди.
• Май ойида эса Тошкент шаҳар ҳокимлиги пойтахт мактабгача ва мактаб таълими бошқармаси тасарруфидаги навбати мавжуд бўлмаган давлат мактабгача таълим ташкилотлари рўйхатини эълон қилган эди.