Тошкент вилояти, Ангрен шаҳридаги 14-ДМТТда “Телефонсиз ДМТТ” тизими жорий этилди. Бу ҳақда Мактабгача таълим агентлиги хабар берди.
Маълум қилинишича, 14-ДМТТ маъмурияти ва ота-оналар кузатув кенгаши иштирокида йиғилиш ўтказилиб, таълим ташкилотида телефондан умуман фойдаланмаслик таклифи маъқулланган. Бу борада Вазирлар Маҳкамасининг 2012 йил “Ўзбекистон Республикаси таълим муассасаларида мобил телефонлардан фойдаланишни тартибга солиш чора-тадбирлари тўғрисида”ги қарорида белгилаб қўйилган.
Таълим ташкилотига кириб келишда ҳар бир ходим, меҳмонлар ва бошқа шахслар телефонларини чақирув овозини тўлиқ ўчириб қўйиши, “овозсиз” режимга ўтказиши шарт. Тарбиячи ўз телефони билан соат 7:00 дан 8:30 гача ва соат 16:30 дан сўнг ота-оналар билан боғланишига рухсат берилади.
Энди соат 8:50 дан 16:30 гача тарбиячиларга машғулотлар вақтида телефон орқали сўзлашиш ҳамда SMS (ММS) ва бошқа турдаги хабарларни жўнатиш тақиқланади. Бироқ тарбиячилар машғулотлар ва тадбирлар оралиғида фақат асосли ва кечиктириб бўлмайдиган зарур ҳолатларда ота-онаси, яқин қариндошлари билан зудлик билан боғланиш мақсадида ДМТТдаги махсус оддий телефондан фойдаланиши мумкин.
Ота-оналар Telegram гуруҳида машғулотлардан фотолавҳалар жўнатиш, услубчи ва ҳамшира зиммасига юклатилди. Таълим ташкилотининг бошқа ходимлари ҳам иш вақтида телефондан фойдаланиш ҳуқуқига эга эмаслиги йиғилишда бир овоздан тасдиқланди.
Изоҳ (0)