Покистон ҳужжати бўлмаган афғон қочқинларини мамлакатдан чиқариб юборишнинг иккинчи босқичини бошлади. Ҳукумат 800 мингдан ортиқ афғонни депортация қилиши мумкин. Бу ҳақда Al Jazeera хабар берди.
Депортациянинг биринчи босқичи 2023 йилнинг ноябрь ойида бўлиб ўтган. Ўшанда 541 мингга яқин афғонистонлик Покистонни тарк этишга мажбур бўлган. Агар улар ихтиёрий равишда кетмаса, ҳибсга олиниши ва мажбуран депортация қилиниши мумкин.
Депортациянинг биринчи босқичидан олдин Покистон ҳукумати мамлакатда 4,4 миллионга яқин афғон қочқинлари борлигини, улардан тахминан 1,73 миллиони ҳужжатсиз эканини даъво қилган. Ҳукумат хавфсизлик муаммолари ва иқтисоднинг қийин аҳволга тушиб қолганини айтиб, афғонларга қарши босимни ҳимоя қилган.
Депортация қарори Покистон бўйлаб қуролли ҳужумлар кескин ошган бир пайтда қабул қилинган, ҳукумат ҳужумларни Афғонистонда жойлашган гуруҳлар ва фуқароларга боғлаган. “Толибон” мазкур айбловларни рад этган.
БМТнинг қочқинлар бўйича Олий комиссарлигининг (УNHCР) Исломободдаги вакили Филиппа Кандлер Покистон ҳужжатсиз афғонларни чиқариб юборишдан олдин уларнинг профилларини ўрганиши кераклиги, чунки уларнинг аксарияти “халқаро ҳимояга муҳтож” эканини айтди.
Улар қочқинлар, террорчилик фаолиятида иштирок этишмайди. Улар шунчаки Афғонистондан қочиб кетган ва ҳимояга муҳтож одамлардир, — деди Кандлер ва агар афғон фуқаролари террорчилик фаолиятида иштирок этган бўлса, “бу билан алоҳида шуғулланиш керак”лигини айтди.
Покистон қочқинлар ҳуқуқларини ҳимоя қилувчи 1951 йилги БМТ конвенциясини имзоламаган. Мамлакатда қочқинларни ҳимоя қилиш бўйича ички қонунлар, шунингдек, ўз чегараларида халқаро ҳимоя сўраган шахсларнинг мақомини аниқлаш тартиблари мавжуд эмас.
Амнестй International ташкилоти Афғонистонга қайтган қочқинлар таъқиб қилиниши хавфидан огоҳлантирган.
Изоҳ (0)