Pokiston hujjati bo‘lmagan afg‘on qochqinlarini mamlakatdan chiqarib yuborishning ikkinchi bosqichini boshladi. Hukumat 800 mingdan ortiq afg‘onni deportatsiya qilishi mumkin. Bu haqda Al Jazeera xabar berdi.
Deportatsiyaning birinchi bosqichi 2023-yilning noyabr oyida bo‘lib o‘tgan. O‘shanda 541 mingga yaqin afg‘onistonlik Pokistonni tark etishga majbur bo‘lgan. Agar ular ixtiyoriy ravishda ketmasa, hibsga olinishi va majburan deportatsiya qilinishi mumkin.
Deportatsiyaning birinchi bosqichidan oldin Pokiston hukumati mamlakatda 4,4 millionga yaqin afg‘on qochqinlari borligini, ulardan taxminan 1,73 millioni hujjatsiz ekanini da’vo qilgan. Hukumat xavfsizlik muammolari va iqtisodning qiyin ahvolga tushib qolganini aytib, afg‘onlarga qarshi bosimni himoya qilgan.
Deportatsiya qarori Pokiston bo‘ylab qurolli hujumlar keskin oshgan bir paytda qabul qilingan, hukumat hujumlarni Afg‘onistonda joylashgan guruhlar va fuqarolarga bog‘lagan. “Tolibon” mazkur ayblovlarni rad etgan.
BMTning qochqinlar bo‘yicha Oliy komissarligining (UNHCR) Islomoboddagi vakili Filippa Kandler Pokiston hujjatsiz afg‘onlarni chiqarib yuborishdan oldin ularning profillarini o‘rganishi kerakligi, chunki ularning aksariyati “xalqaro himoyaga muhtoj” ekanini aytdi.
Ular qochqinlar, terrorchilik faoliyatida ishtirok etishmaydi. Ular shunchaki Afg‘onistondan qochib ketgan va himoyaga muhtoj odamlardir, — dedi Kandler va agar afg‘on fuqarolari terrorchilik faoliyatida ishtirok etgan bo‘lsa, “bu bilan alohida shug‘ullanish kerak”ligini aytdi.
Pokiston qochqinlar huquqlarini himoya qiluvchi 1951-yilgi BMT konvensiyasini imzolamagan. Mamlakatda qochqinlarni himoya qilish bo‘yicha ichki qonunlar, shuningdek, o‘z chegaralarida xalqaro himoya so‘ragan shaxslarning maqomini aniqlash tartiblari mavjud emas.
Amnesty International tashkiloti Afg‘onistonga qaytgan qochqinlar ta’qib qilinishi xavfidan ogohlantirgan.
Izoh (0)