Бирлашган Миллатлар Ташкилоти Покистондан депортация қилинган афғонистонликларга ёрдам сифатида 3,8 миллион доллар ажратди.
Бутунжаҳон озиқ-овқат дастури бу маблағ билан Афғонистонга қайтишга мажбур бўлган қарийб 33 минг оила ёки 230 мингдан ортиқ эркак ва аёлга, жумладан, ногиронларга бир ой давомида ёрдам кўрсатиши мумкинлигини эълон қилди.
Эълонга кўра, 33 мингга яқин оилага нақд пул кўринишида ёрдам берилади.
Айни пайтда, Бирлашган Миллатлар Ташкилотининг Инсонпарварлик ёрдамини мувофиқлаштириш бошқармасининг (OCHA) Афғонистондаги ваколатхонаси раҳбари Изабел Моссард Карлсеннинг айтишича, озиқ-овқат етишмовчилиги авжига чиққан пайтда, бу ёрдам Покистондан қайтган минглаб афғонистонликлар учун ҳаёт манбаи ҳисобланади.
Аввалроқ Покистон матбуоти мамлакат полицияси 4—7 февраль кунлари 3766 нафар афғон қочқинини депортация қилгани ҳақида хабар берганди.
Ўтган ой Халқаро миграция ташкилоти ҳам сўнгги тўрт ой ичида 5200 га яқин афғон қочқинлари Покистондан мажбурий ёки ихтиёрий равишда Афғонистонга қайтганини эълон қилди.
Изоҳ (0)