Покистон полицияси афғон қизларини зўрлаш билан таҳдид қилган — HRW

Айрим афғон муҳожир аёллари Human Rights Watch ташкилотига Покистон полицияси уларни жинсий таъқиб қилиб, зўрлаш билан қўрқитганини айтди. Бу ҳақда Afghanistan International хабар берди.

Ташкилотга кўра, Покистон ҳукумати афғон муҳожирларига нисбатан кенг кўламли қонунбузарликларга йўл қўйган. Яқинда “Толибон”нинг Карачидаги консуллиги “покистонлик ҳарбий” афғон қизини ўғирлаб кетгани ҳақида хабар берганди.

Покистон расмийлари оммавий ҳибсга олиш ва афғон муҳожирларининг мол-мулкини мусодара қилишдан ташқари, минглаб афғонларининг шахсини тасдиқловчи ҳужжатларини йўқ қилган. 

“Покистон ҳукумати афғон муҳожирларига нисбатан кенг кўламли қонунбузарликларга йўл қўйиб, уларни Афғонистонга қайтишга мажбур қилмоқда”, — дейилади HRW ҳисоботида.

2023 йил сентябрь ўрталаридан бери Покистон ҳукумати 400 мингдан ортиқ афғон муҳожирини депортация қилган.

“Покистон ҳукумати афғонларни Афғонистондаги хавфли шароитларга қайтишга мажбурлаш муҳитини яратди”, — дейди Human Rights Watch’нинг Осиё бўйича директори Элейн Пирсон. 

У Покистон расмийларидан муҳожирларга нисбатан ҳуқуқбузарликларни зудлик билан тўхтатишни ва хавф остида қолган афғонларга Покистонда қолиш имкониятини беришни сўради.

Ҳуқуқ фаоллари ва журналистларнинг хабар беришича, Покистон ҳукуматининг ёмон муносабати афғон муҳожирларини мамлакатни тарк этишга мажбурлаш кампаниясининг бир қисмидир. Уларнинг айтишича, полиция афғон муҳожирларини калтаклаган, қўрқитган ва ҳибсга олган.

Human Rights Watch ташкилотининг билдиришича, Покистон полицияси муҳожирлардан пора ва тақинчоқлар талаб қилиб, уларнинг барча қорамоллари ва бошқа мол-мулкини мусодара қилган, муҳожирларнинг уйларини бульдозерлар билан вайрон қилган. Депортация қилинган ёки Покистонни тарк этишга мажбур бўлганлар орасида Покистонда туғилган ва ҳеч қачон Афғонистонда яшамаган афғонлар ҳам бор.

Маълумотларга кўра, Покистон расмийлари АҚШ, Британия ва бошқа мамлакатларга жойлашишни кутаётган, визасини узайтира олмаган афғонлардан чиқиш тўлови сифатида 830 доллар олган.

Элейн Пирсон хавф остида бўлган афғонларни жойлаштиришга ваъда берган давлатларни бу жараёнларни тезлаштиришга, Покистонга эса инсон ҳуқуқлари бўйича ўз мажбуриятларини бажаришда босим ўтказишга чақирди.