1995 йилда эфир юзини кўрган “Жуманжи” фильмини суратга олиш жараёнида техник имкониятлардан фойдаланилгани ўша вақт учун янгича ёндашув бўлган. Ўзига хос сюжет ҳамда Робин Уильямснинг ижроси сабаб мазкур фильмга сарфланган пулдан 4 баравар кўп даромад кўрилган. Мухлислар учун севимли фильмлардан бирига айланган кинодаги актёрлар ҳақида маълумотларни эътиборингизга ҳавола этамиз.

Жуди Шеперд — Кирстен Данст

Суратга олиш жараёнида Кристен 13 ёшда бўлган ва “Жуманжи” у рол ижро қилган биринчи фильм бўлмаган. У 1994 йилда “Вампир билан интервью” фильмида Бред Питт ва Том Круз билан бирга суратга тушган.

Кирстен мактабни тамомлаганидан сўнг актриса сифатида фаолиятини давом эттирган. 2000 йиллардан кейин унинг карьерасида янги босқич кузатилади. У “Қарға”, “Ўргимчак одам”, “Уимболдон” каби муваффақиятли фильмларда суратга тушади ва машҳурликка эришади.

Кирстен бугунги кунда хайрия ишлари билан фаол шуғулланиб келади. Айни вақтда 41 ёшда бўлган актриса оила қурган ва икки фарзанди бор.

Питер Шеперд — Бредли Пирс

Бредли боғча вақтиданоқ карьерасини бошлаган, реклама роликларида суратга тушган, мултфильм қаҳрамонларига овоз берган.

Актёр сифатида турли сериаллар ва телевизион лойиҳаларда эпизодик роллар ижро қилган. 

“Жуманжи” фильмидаги роли эса илк кўзга кўринадиган роллардан бири бўлган. Шундан кейин унга турли фильмларга рол ижро қилиш учун таклифлар келиб туша бошлаган.

Аммо ўсмирлик даврида унда сурункали депрессия касаллиги кузатилгани сабаб кейинчалик у фильмларда камнамо бўлиб қолган ва фаолиятини дубляжда давом эттирган. “Питер Пен”, “Соҳибжамол ва махлуқ” “Сув париси” мултфильмлари шулар жумласидан.

У турли телешоуларни саҳналаштириш ва қисқа метражли фильмларни суратга олишда ўзини синаб кўрган. 40 ёшда бўлган Пирснинг уч нафар фарзанди бор ва у бугунги кунда бизнес билан ҳам шуғулланади.