Йоргос Лантимоснинг янги “Шўрлик бахтсизлар” фильми қизғин кутиб олинди. Фильм Венеция кинофестивалининг асосий мукофотини қўлга киритди. Бундан ташқари, картина BAFTA томонидан 2024 йилнинг энг яхши грим ва соч турмаги учун эътироф этилган. Олдинда эса 11 та номинацияда номзод бўлган “Оскар” турибди. Бу тасодиф эмас, чунки таниб бўлмас даражада ўзгариб кетган Эмма Стоундан илк дақиқадан охиригача кўз узолмайсиз.
Йоргос Лантимос — кино ихлосмандлари сабрсизлик билан кутадиган фильмлари билан танилган режиссёр ва “Шўрлик бахтсизлар” ҳам бундан мустасно эмас. “Маъшуқа” фильмидаги муваффақиятли ишдан сўнг, Лантимос Эмма Стоунга янги фильмида асосий ролни таклиф қилади.
Викториан давридаги Англиядан келган 9 ойлик ҳомиладор ёш аёл ўз жонига қасд қилади. Уни сувдан чиқариб олган тиббиёт соҳасида даҳо ҳисобланган Годвин Бахтер қизнинг ҳаётини сақлаб қолади ва аёлнинг онгини ҳали туғилмаган фарзандининг миясига трансплантация қилади. Натижада бола руҳиятига эга катта ёшдаги аёл — Белла Бахтер дунёга келади.
Таъкидлаш жоизки, Эмма Стоун образининг ташқи кўриниши диққатга сазовор. Актрисанинг ёрқин жигарранг сочлари роли сабаб тим қора рангга айланган. Бўёқ тегмаган оқ териси билан контраст яратган соч турмаги янги ҳайратланарли қиёфани тақдим этади. Ҳикоя давомида қаҳрамон дунё бўйлаб сафарга чиққани сари сочлари янада узунроқ ва итоатсизроқ бўлади. Бу тасодиф эмас, балки метафора — сочлар ўсади, қўзғолон қилади, худди қаҳрамоннинг ўзи каби: бола Белладан аёл Беллага айланадиган жараён. Соч турмаги ва грим бўйича дизайнер Надья Стейси Стоун билан “Круэлла” ва “Маъшуқа” каби фильмлар устида ҳам бирга ишлаган.
Макияжсиз қаҳрамон
Белла макияжсиз бўлиши кераклиги тўғрисида қарор Лантимоснинг ўзи томонидан қабул қилинган. У “Франкенштейн тарихи”нинг маҳсулоти, ўлим панжасидан тортиб олинган ва онанинг танасида қайта туғилган бола. Ҳатто енгил макияж томошабинни фильм бошидаги сирлилик, даҳшат ва ҳайрат атмосферасидан маҳрум қилиши мумкин эди. Шу сабабли Надья макияж қилиш ўрнига актрисанинг терисини парваришлашга эътибор қаратади. Бош қаҳрамоннинг юзи янги ва ёш кўриниши учун унинг қалин қошларини соч рангига мослаб, гел билан шакл беради.
Тўлиқ макияж Белла Парижга келгач, бордел эгаси мадам Суини билан танишиб, унинг қўл остида иш бошлагач пайдо бўлади. Надья Стейсининг сўзларига кўра, гримёрлар макияж орқали қаҳрамоннинг дунёнинг қарама-қарши тарафини очиши, ҳаётий тажриба орттириб, ўзини таниб олишга ёрдам берган трансформациясини кўрсатишлари керак эди.
Белла сочларини яратиш жараёни
Стоуннинг сочлари шунчаки қорайтирилмаган. Лантимос қаҳрамонини иродасиз чинни қўғирчоқ қилиб кўрсатишни истарди. Ишнинг биринчи куни Надья Стейсига кўрсатмалар берилган: Белланинг сочи узун ва қора бўлиши, улар белидан тушиб туриши ва фильм давомида ўсиб, товонигача етиши керак эди. Энг муҳими: ҳеч қандай парикларсиз — Лантимос уларни ёмон кўрарди.
Сочлар Белланинг ҳар бир саргузаштида узайиб, уларнинг тез ўсиш темпи қаҳрамоннинг шахсий эволюциясини рамзи эди. Шунингдек, сочлар атайлаб ёйилган ҳолда қолдирилади. Бу эса Викториан жамияти қоидаларга мос келмаслигининг белгиси эди, чунки ўша даврнинг барча аёллари тартибли йиғилган турмаклардан фойдаланган.
Образ яратиш жараёнида Надья австриялик рассом Эгон Шиленинг “Юбка кийган қора сочли қиз” картинасидан илҳомланган. У Стоунга суратга олиш бошланишидан олдин жигарранг сочларни қорамтир каштанрангга бўяшни маслаҳат беради.
Лантимос Эмманинг янги образдаги фотосуратини кўрганида керакли нарсани топганини тушунади: “Ғоя шундай эдики, Белла ўз даврининг реаксионери, аммо болаларча беғубор ва содда. Қора соч оппоқ тери билан контраст яратиши керак эди”, — деб эслайди Стоун.
Суратга олиш ишлари бошланганида актрисанинг сочига табиий соч тутамлари қўшилади. Улар кичик сочларга маҳкамланиб, Эмманинг ҳақиқий сочларига аралашиб кетарди. Воқеа ривожланиб боргани сари Надья янада катта тутамларни қўшиб, соч узунлигини 76 сантиметрдан деярли икки метрга узайтиради.
“Сочлар ўзига хос алоҳида персонаж, — дейди Стейси Allure журналига берган интервьюсида. — У Белла ким эканлигини эслатиб туради. Қаҳрамон атрофидагиларга ўхшамайди. Чунки у бу нарсаларга бегона, у бошқача”.
Изоҳ (0)