АҚШ ҳукумати Шимолий Кореянинг ядровий синовларига жавобан Япон денгизига авиаташувчи кема юборишни режалаштирмоқда. Бу ҳақда Kyodo News+ хабар берди.
«Қарор Япония ва Жанубий Корея билан биргаликда қабул қилиниши кутилмоқда. АҚШ президенти Жо Байден маъмурияти Шимолий Кореяга нисбатан санкцияларни кучайтириш бўйича БМТ Хавфсизлик кенгаши резолюцияси лойиҳасини ҳам тайёрламоқда», — дейилади баёнотда.
Бундан ташқари, ракета синовларига жавобан Вашингтон, Сеул ва Токио Пхеньянга қўшимча санкциялар жорий этиш ниятида, бу эса нефть маҳсулотлари экспортига ва «Шимолий Корея расмийлари билан алоқадор хакерлар» ишига таъсир қилади.
АҚШ ва унинг Осиёдаги энг яқин икки иттифоқчиси билан алоқаларни қўллаб-қувватлаш учун Американинг Ҳинд-Тинч океани қўмондонлиги раҳбари адмирал Жон Акилино Япон денгизидаги сафари давомида ядровий самолёт ташувчи кемада Япониянинг ўзини-ўзи мудофаа қилиш кучлари ва Жанубий Корея ҳарбийларининг юқори мартабали зобитларига қўшилиши мумкин.
АҚШ ҳукумати Шимолий Кореяни кейинги провокациялардан тийилишга ва Корея ярим оролини тўлиқ ядросизлантириш йўлида «барқарор ва мазмунли мулоқот» олиб боришга чақирди.
Изоҳ (0)