Исроил кучлари 21 июнь Халқаро Қизил Хоч ташкилотининг Ғазодаги идорасига ҳужум уюштириши оқибатида 22 киши ҳалок бўлган. Бу ҳақда ташкилот мутасаддилари берган маълумотга асосланиб, BBC хабар берди.
Манбада айтилишича, Исроил қўмита биносида ҲАМАС аскарлари яширинганини сабаб қилиб, унга ҳужум уюштирган. Оқибатда унда бошпана сақлаб келаётган тинч аҳоли вакиллари ҳужумда ҳалок бўлган.
“Оғир калибрли ракеталар жума куни тушдан кейин Халқаро Қизил Хоч қўмитаси идораси ва қароргоҳларидан бир неча метр масофага келиб тушган”, — дейилади қўмита баёнотида.
Ҳужум ҳудудида ҳалок бўлган 22 киши маҳаллий шифохонанинг қурбонлар бўлимига олиб кетилган. Қизил Хоч қўмитаси жароҳатланганлар сони 45 кишига етганини маълум қилган.
“Биз гуманитар ёрдам ва тинч аҳоли ҳаётини хавф остига қўювчи бу ҳодисаларни қоралаймиз”, — дейилади Халқаро Қизил Хоч ташкилоти махсус баёнотида.
Ғазо Соғлиқни сақлаш вазирлиги ҳам ҳодиса юзасидан қисқа баёнот берган. Унда ҳужум оқибатида 25 киши ҳалок бўлгани ва 50 киши жароҳатлангани айтилган.
Изоҳ (0)