Эквадорда 19 июнь куни юз берган энергия тизимидаги ҳалокат туфайли 17 миллион киши электр тармоғидан узилиб қолди. Бу ҳақда CNN нашри хабар берди.
Расмийларнинг таъкидлашича, тармоқдаги узилиш шифохоналар, уй-жойлар ва метро тизимига таъсир қилган. Электр узилишига мамлакат энергия тизимидаги техник хизмат кўрсатиш ва узатиш муаммолари сабаб бўлган.
Жамоат инфратузилмаси вазири Роберто Луке чоршанба куни бўлиб ўтган матбуот анжуманида ҳолат юзасидан қисқа баёнот эълон қилган. Энергия узилишлари техник хизмат кўрсатиш пастлиги ва электр узатиш инфратузилмасини сақлаб туриш учун инвестицияларнинг этишмаслиги билан боғлиқ эканлиги маълум қилинган.
Авариядан сўнг ҳукумат дарҳол тизимни қайта тиклашга киришган. Ҳозирда мамлакатнинг 95 фоиз ҳудудида тизим қайта ишга тушган.
Эквадорда бу каби энергия муаммолари мунтазам кузатилади. Сўнгги йирик ўчирилиш 2024 йилнинг апрелида кузатилган. Ҳукумат фавқулодда баёнот эълон қилиб, мамлакатда 8 соатга электрни ўчирган. Ҳодисага йирик энергия сақлаш тизимлари ишдан чиқиши ва уларни қайта тиклаш зарурати юзага келиши сабаб бўлган.
Қатор расмийлари ҳукуматни ушбу каби муаммоларда бош айбдор сифатида кўрсатган. Мамлакат раҳбариятини ўткир иқтисодий муаммолар турганда иккиламчи масалаларга эътибор қаратишда айблаган.
19 июнь куни юз берган блекаут мамлакат бўйича тахминан 2 соат давом этган. Шу икки соат давомида йирик инфратузилма объектлари, хусусан, аэропортлар ва ҳарбий муассасалар ҳам тармоқдан узилиб қолган.
Изоҳ (0)